Shillong, Nailar 14: Ka tnad ka rep ka riang ka Sorkar Pdeng kala sngap iaka jingkyrpad u Myntri Rangbah ka jylla u Conrad K. Sangma ban shah ia ki samla pule ka Meghalaya kiba don ha Central Agriculture University (CAU) Imphal ban bteng iaka jingpule jong ki hapoh ka CAU Campus kaba don ha Kyrdemkulai Ribhoi District.
Kane kadei hadien ba ka Central Agriculture University (CAU), Imphal mynta ka 14 tarik Nailar kala pynmih iaka hukum ban shah iaki samla pule Undergraduate na bar ka jylla Manipur bad na College of Food Technology Imphal jong u snem 2020-21, 2021-22 bad 2022-23 ban bteng iaka jingpule da ka juk Online Mode.
Lah ban kdew ba u Myntri Rangbah ka jylla u Conrad K. Sangma ha ka 7 tarik mynta u bnai, ha ka jingleit sha Delhi ula kyntu ia u myntri ka tnat ka rep ka riang u Narendra Singh Tomar ban shah iaki samla pule ka Meghalaya kiba don ha CAU, Imphal ban bteng iaki jingpule ha CAU Campus kaba don ha Kyrdemkulai in Ri-bhoi District.
Ka hukum jong ka CAU, Imphal ka kdew ba kala pynbiang iaki jingdonkam ki samla pule hadien ba la bishar iaka jinglong jingman hapoh ka jylla Manipur hadien ba la ioh iaki jingai jingmut na ki kmie ki kpa, ki samla pule bad kumjuh ruh na ki sorkar jylla bapher bapher.
Haka hukum bala pynmih da u Regitrar ka CAU Imphal u T.R Sharma ka kdew ba ki jingpule Masters bad PhD hapoh ka College of Agriculture, Imphal ki lah ban iaid katkum ki juk Online bad ki jingpule RAWE programme jong u snem 2020-2021 B.Sc Agriculture la ban bteng hala ki jong ki jylla.
La ong ruh ba ki jingpule ki samla ia ka M.Sc bad PhD jong ka CAU Imphal ki lah pyndep ia ki Research Work ha ki College of CAU/ICAR Institute/KVK hala ki jong ki jylla.
La kdew ruh ba ki samla pule kiba la jan pyndep iaki jingpule bad kiba dang pynkhreh iaki Theses jong ka M.Sc lane PhD ki lah ban pyndep da kaba iakren bad la ki Guides.
Haba iadei bad kane u Myntri Rangbah ka jylla u Conrad K Sangma ula iathuh sha ka tnat ka rep ka riang ka sorkar pdeng da kaba kdew “Ngi la khmih ba ka jinglong jingman hapoh ka jylla Manipur kan bha noh bad ka shongsuk shongshngain kan wan phai noh khnang ba ki samle pule kim dei ban shah ktah hynrei haduh mynta ka jinglong jingman kam pat shngain bad dei namar kane la dei ban shah noh iaki samla pule napoh ka jylla ki ba don ha CAU Imphal ban bteng iala ki jingpule hala ki jong ki jylla kum hapoh ka CAU kaba don ha Kyrdemkulai, Meghalaya namar kane ka shlem jingpule ruh ka hap hapoh ka jingkhmih jong ka CAU Imphal”.
