Shillong, Nailar 14: Ki Sohtrun na ka jylla Meghalaya kiba la pyninam ha Abu Dhabi Mall, mynta pat la pynkhreh ban pyninam ha New Delhi ha ka ‘Pineapple Fest 2023’ kaba lai sngi kaban long ha Dilli Haat naduh ka 18 tarik u Nailar.
Katkum ki jingtip na ki heh sorkar, kila iathuh ba katei ka festival kaba lai sngi kan sdang da kaba pynlong iaka ‘Cultural Programme’ ha ka sngi Thohdieng bad hadien kane yn sa pynbud pat da ki prokram bapher ha ki sngi kiba bud.
U Heh ophisar ka sorkar Meghalaya ula iathuh ba ki Sohtrun kiba thiang bad kiba bang ia mynta la pyni paidbah ha Abu Dhabi Al-Wahda Mall bad ia kitei ki Sohtrun la pyniaid ïew lyngba ka Lulu Group ha ki ïew ki hat kiba don ha Gulf.
Ia u Sohtrun la thung da ki trai shnong ha kylleng ki bynta jong ka jylla kaba long katkum ka jinghikai kaba kila ioh naduh ki por kiba mynshwa bad kidei ruh ki jingthung ki bym shim la ai dawai ne Organic.
Kiwei kiwei ki jingthung kiba kynthup ia u Sohniamtra, Shynrai bad u Sohtrun kila sdang ban paw nam ha kylleng ki ri.
Ki heh ophisar kila pyntip ruh ba ia kajingthiang jong u Sohtrun la thew lyngba ka ka Brix.
