Shillong, Nohprah 19: U Myntri ka tnat Animal Husbandry & Veterinary u Bah A.L Hek hynne ka sngi ula plie iaka Ot-doh Modern Bi- Species kaba don hapoh ka shnong Demthring West Jaintia Hills District.
Ha kane ka sngi la don lang ki MLA Bah Lahkmen Rymbui bad Bah Wailadmiki Shylla., Dr. H K Marak, Director AH &Veterinary Department, Dr. D.I Kjam District Veterinary Officer, Jowai.
Haba kren ha kane ka sngi u Bah A.L Hek ula pynpaw ka jingskhem jingmut halor ka jingdon ka jaka ot doh lane ka Modern Bi- Species ka ban iarap ban wanrah ka khuid ka suba hapoh kane ka thain.
U Bah Hek ula kyntu iaki nongot doh ban iatreilang bad ban bud iaki kyndon haba iadei bad ka rukom ot doh kum ka juk mynta kum shi bynta ban wanrah ka khuid ka suba.
Naka liang u Deputy Director, (Planning) Directorate ka AH & Veterinary u Dr. W M W Khongwir ula ong ba kane ka jaka ot doh ka lah ban set 50 tylli ki Masi bad 100 tylli ki sniang.
Ula pyntip ba Ia kane ka jaka ot doh Modern Bi-Species la sdang pyntrei naduh 2014 bad la mang tyngka naka National Agricultural Bank for Rural Development (NABARD) haka jinglut kumba T. 7.83 klur.
Kiwei kiba kren ha kane ka sngi ki kynthup u Bah Lahkmen Rymbui bad u Bah Wailadmiki Shylla, u Bah Limba Dkhar, President ka Jaintia cattle Butchers’ Welfare Association, u Bah Boldness Ryngkhlem, Secretary ka sein ki nong ot doh Sniang Jaintia Hills, u Bah Elword Ryngkhlem, Rangbah Shnong Demthring.
