Shillong, Nohprah 02 : U Myntri kam pynroi sor ma Sniawbhalang Dhar hynne ka sngi thohdieng, ula plie paidbah ia ka Building jong ka Children’s Home ki Khynnah Kynthei bala pyniaid da ka World Mission ha Nartiang, West Jaintia Hills District.
Haba kren ha ka jingialang, u ma Sniawbha ula pynpaw ia ka jingsngewnguh bad sngewsarong ba ka World Mission kala trei bad lehbha ha ka constituency ba u mihkhmat khamtam ban ri bad sumar ia ki Khynnah Khun Swet kiba donkam ia ki nongri nongsumar.
Kat kum ka jingong jong u, “Nga la iohi 3-4 tylli kum kine ki Iing Mission hynrei ki dang don ki jingduna hangne hangtai hynrei kane ka Iing Mission (Children’s Home) ka long kaba kham bit kham biang ban ianujor bad kiwei kiba ula iohi” ong u Myntri.
U Myntri ula iaroh ruh ia ki Nongpyniaid bad ki Nongpeit jong kane ka Children’s Hime naba ka dei ka kam kaba eh bad kaba hap pynlut ka spah bad ka por ban pdiang ia ki Khunswet naduh ka bailut baisep ha ka jingpynbiang bam iaki, ka jingai ia ka jingnang jingstad wat ki Kmie Kpa kin ym lah ban leh janai kum ma ki.
U Myntri ula kular ba un sa shimkhia ban iarap lem ia ki jingdonkam jong kane ka Children’s Home kat kum kaba la pynpaw da ki Rangbah ka World Mission lyngba ka dorkhas bala aiti ha u.
U Ma Thombor Shiwat, MDC ka Nartiang bad CEM ka Jaiñtia Hills Autonomous District Council (JHADC) ula pynpaw ia ka jingsngew kmen ban iohi ia ka jingshakri jong ka World Mission iakiba bun ki khun swet ha kane ka Misson.
Une u MDC ula pynbna ba ula dep ban buh skhim ba T. 5 lak ban shna ia artylli ki painkhana ia ki kynthei bad ki shynrang ha kane ka jaka ri ia ki khunswet.
Kiba la iadonlang ha kane ka sngi ki kynthup ia u Pastor Rev RS Mawlong ,Rev DL Syiemlieh General Secretary Tbn K D.Nongneng,Treasurer Mr. JR Khongjee bad Tbn SK. Ñiangmih lem bad ki khynnah jong kane ka children’s Home bad kiwei kiwei.
