Shillong, Lber 31: U MP ka Rajya Sabha u Dr. WR Kharlukhi hynne ka sngi Nyngkong ula plie paidbah ia ka iing dorbar ba thymmai jong ka Dorbar Shnong Nongkseh kaba la shna lyngba ka skhim jong u MP ka Rajya Sabha bad na ka skhim CMSDF.
Ha kane ka jingplie ia ka iing dorbar la don ryngkat u BDO ka Mylliem C&RD Block u Bah Toshan Marwein, u OSD jong u Myntri Rangbah ka Jylla u Bah Daniel Thangkhiew, ki nongkitkam shnong jong ka Dorbar Shnong Nongkseh, ki nongialam shnong ka shnong Lummawbah bad ki paidbah nongshong shnong.
U Rangbah Shnong ka Nongkseh u Bah Myrank Thangkhiew ula ong, ba ka shnong kala don ia ka jingangnud kaba la slem bha ban ioh ia ka iing dorbar kaba paka bad dei lyngba ka jingiarap jong uwei u Executive Member ka shnong u Bah Daniel Thangkhiew uba la shimkhia ban prat lynti ban pynioh ia ka jingkyrshan na ka skim MP bad kumjuh na ka skhim jong u Myntri Rangbah ka jylla ha kaba la lah ban pynurlong noh ia kane ka jingangnud jong ka shnong.
U Dr WR Kharllukhi haba kren ha ka jingialang, ula ong ba ki Rangbah Shnong ki don ka bynta kaba khraw ha ka imlang sahlang bad ka jingai jingshakri ka jongki ia ka shnong ka thaw kadei ka kam mishon namar kim ioh satia ia kano kano ka jingsiew ne tulop.
Ula ong, ba kum u MP ka Rajya Sabha u hap ban peit ban mang ia baroh lang kiba don ha ka jylla Meghalaya baroh kawei na ka bhah MP Scheme ka jongu bad ka kham pher na ki MP ka Lok Sabha kiba mih khmat ia ka Khasi-Jaintia bad ia ka Garo la ka jong, hynrei ula ong pat ba kala don ka jingkular na ka sorkar pdeng ban mang sa mar T.5 Klur ia ki MP ka Rajya Sabha jong ka thain shatei lam mihngi ka ri, kumta lada u ioh shuh shuh ia ka bhah tyngka kum u MP Rajya Sabha yn sa mang pisa biang ia ka shnong Nongkseh.
Katba u Bah Daniel Thangkhiew ula ong, ba la ioh ban tei ia kane ka iing dorbar kaba thymmai lyngba ka jingbhah tyngka u Myntri Rangbah ka Jylla u Conrad K Sangma na ka skhim CMSDF kaba long T.15 Lak bad la ioh ruh T.15 Lak na ka skhim jong u MP Rajya Sabha.
