Shillong, Nailar 30 : U Bah Lambor Malngiang, MLA/MDC ka Nongkrem hynne ka sngi u la plie ia ka Sub-Centre ha Mawmuthoh, East Khasi Hills District.
Ia kane ka jingialang plie sub centre la pynlong da ka ophis District Medical and Health Officer ka District Shillong ryngkat ka jingiatreilang bad ka Directorate of Health Services (MI), Meghalaya bad ruh ka Health Engineering Wing, Shillong.
Ia katei ka sub centre la tei ha ka jinglut kaba kot 15 lak tyngka.
Haba kren ha ka jingialang u Bah Lambor uba dei u Nongaibuit u Myntri Rangbah, u la ong ba kadei hadien bun bun snem ba ka jingangnud ki paidbah ka la urlong da ka jingplie ia katei ka sub centre ha Mawmuthoh.
U ong ruh ba ki paidbah mynta ki lah ban ioh ia ki jingmyntoi ha ka koit ka khiah khlem da donkam shuh ban leit shaduh Smit kumba ki ju leh baroh shi katta.
U ong ruh ba ka jingurlong katei ka jaka sumar kadei na ka jingtreilang ki nongialam shnong bad ruh ki nongshong shnong baroh.
La pynshongkun ia ka jingialang da ki prokram na ki khynnah skul jong ka Little Flower LP/Up School bad Chakinah School, Mawmuthoh.
