Shillong, Jymmang 13 : U Symbud Myntri Rangbah ka tnad Public Works Department Bah Prestone Tynsong ha ka sngi Balang, u la plie paidbah ia ka surok bad ka Jingkieng thymmai jong ka Umiam By-pass, kaba la shna kyrpang na ka bynta ban iaid ki bos night super bad kumjuh ia kiwei ki kali heh.
Kane ka Jingkieng bad jrong 75 mitar bad surok ba thymmai kaba don 2.260 km, ka dei kaba don ha ki bynta ba sharum jong ka Jingkieng Umiam, kaba la khang ia ki bos night super bad kiwei ki kali heh ban iaid ban pynneh ia ka jingskhem jong ka.
Ha kane ka sngi ka donlang ruh u MLA ka Umroi Bah Damanbait Lamare, Commissioner Secretary ka PWD Sanjay Goyal, Chief Engineer PWD, DC ka East Khasi Hills bad ADC ka Ri Bhoi, SP ka East Khasi Hills bad SP Ri Bhoi, ki Engineer ka tnad, ki ophisar, ki nongialam shnong bad ki paidbah nongshong shnong.
Haba kren ha ka jingialang u Bha Prestone u la iathuh ba hadien ba la khang noh ia ki bos ba wan na kylleng kumjuh ia ki kali heh ban iaid na jingkieng dam, ka la mih ka jingud jingnam na ki paidbah namar ba ka la ktah bha ia ka leit ka wan khamtam ki kali kit mar.
“Kumta na ka liang ka sorkar ngi la shim ka lad ka ba kyrkieh ban phah shna da kawei ka jingkieng bad ka surok thymmai ban pynsuk ia ka leit wan ki paidbah bad ki kali kamai. Nga sngewkmen ba ka tnad PWD ka la thaw ia ka rekod ba tang hapoh 12 bnai ka la lah ban pyndep ia ka Jingkieng bad ka surok ba thymmai,” u la ong.
Na ka liang u Bah Damanbait, u la ong ba ki sngewkmen ba mynta ki bos night super na kiwei ki kylla, kiba hap shu ïeng ha Damsite la bun bun bnai, kin ioh ban kiew biang sha jaka ïeng pynieng kaba don ha ISBT bad ruh kiwei ki kali heh khlem da donkam shuh ban leit naduh bypass ter ter sha Mawryngkneng ban poi pat sha Shillong.
La ioh ruh ia ka jingkren na u Commissioner Secretary ka PWD u Sanjay Goyal, Chief Engineer PWD Bah WR Lyngdoh bad kiwei kiwei.
La pynbna ba kane ka Jingkieng bad surok thymmai kan plie na la bynta ban iaid paidbah naduh kane ka sngi Palei ka 14tarik.
Ha kane ka sngi ka donlang ruh u Commissioner Secretary ka PWD Sanjay Goyal, Chief Engineer PWD, DC ka East Khasi Hills bad ADC ka Ri Bhoi, SP ka East Khasi Hills bad SP Ri Bhoi, ki Engineer ka tnad, ki ophisar, ki nongialam shnong bad ki paidbah nongshong shnong.
