Manipur | Shah siat iap 3 ngut ki nongialam Niam ha Kangpokpi | Pakhang ia ka NH-2 | Nang pynkhlain bor pahara

Imphal, Jymmang 13: Kumba laingut ki nongialam niam Christian ki la shah siat iap bad katto katne ngut pat ki la mynsaw hadien ba la suba ba ki kaikhlaw kila thombor ia ar tylli ki kali kiba kit ia ki dkhot jong ka Thadou Baptist Association (TBA) ha ka District Kangpokpi jong ka Jylla Manipur kaba la pynshong syier ki paidbah bad ka jingkhang surok bah (NH-2) kaba dei ka kynti ka ba kongsan jong ka jylla.

Ki lanot ki kynthup u General Secretary barim ka Manipur Baptist Convention (MBC) u Rev. V. Sitlhou, u Rev. V. Kaigoulun, bad u Pastor Paogoulen.

Ki tyllong khubor ki iathuh ba kitei ki lanot ki dang wanphai sha Kangpokpi na ka Churachandpur district hadien ba ki la leit sha ka jingialang jong ka TBA ha Lamka ha kaba ki kaikhlaw kila thombor iaka ia ka kali jong ki hapdeng ka thain Kotzim bad Kotlen.

Ym duna sa 5 ngut kiwei pat ki la mynsaw ha katei ka jingshah thombor bad ki dang shah sumar.

La iathuh ba kiba la mynsaw ki kynthup ia u Rev. S.M. Haopu, u Rev. Hekai Simte, u Rev. Paothang, bad 2 ngut ki nongniah kali kata u Lelen bad u Goumang.

Katei ka jingshah thombor kala wanrah ka jingbitar ha kylleng ki jaka ba shong ki jaidbynriew Kuki-Zo, ha kaba ka Kuki Students’ Organisation (KSO), Churachandpur District, ka la pynbna ban khang surok khlem pud sngi naduh ka por 12:30 baje mynstep jong ka 12 tarik Jymmang.

Ki nongïakhih ki la pakhang ia ka surok bah NH-2, kaba la ktah jur ïa ka leit ka wan kaba pynïasoh ïa ka Manipur sha Nagaland bad kiwei pat ki bynta jong ka thain.

Ha ka kyrwoh, ka KSO ka la pynrem ïa kane ka jingthombor kum ka ka jingpynïap beiñ ïa ki nongïalam Balang TBA kiba lui lui bad ka la kynnoh ïa ka jingbym lah jong ki bor Sorkar ban tehlakam ïa ki kam thombor ha kane ka thaiñ.

Ki jingshakri kiba kongsan, kynthup ïa ki jingdonkam kyrkieh ha ka liang ka koit ka khiah, ka bording, ki jingtreikam jong ki lad pathai khubor, bad ki jingleh niam, la pyllait naka pakhang shnong.

Ka Kuki Inpi Manipur (KIM), kaba dei ka apex body jong ki jaitbynriew Kuki, ka la pynrem jur ruh ïa kane ka jingjia, da kaba ong ba ka dei ka jingleh riewkhlaw kaba thmu ban thombor iaki nongïalam Balang bad ki riew paidbah ki bym don tiar ialeh.

Ka KIM ka la kdew ba dang shen u Rev. V. Sitlhou u la ïashim bynta haka jingiakren iasuk bad ka Nagaland Joint Christian Forum (NJCF) ha Kohima kaba thmu ban kyntiew ïa ka jingïasuk bad ka jingïasngewthuh jingmut hapdeng ki jaidbynriew.

Da kaba khot ia ki jingshah pyniap kum ka jingshah thombor ha ki jingpyrshang ban iasuk kiba dang iaid shakhmat, ka seng ka la kyntu ia ka Sorkar India ban pynlong ia ka jingtohkit kaba bniah ban pynthikna ba kito kiba donkti kin shah pynngat ha ka ain.

Hadien katei ka jingshah thombor, la iathuh ba la ki bor Sorkar kila pynbun ia ki bor pahara ha katei ka jaka.

Kane ka jingjia ka la pynjur shuh shuh ïa ka jingïakynad bad ka jingbymiasngewthuh jingmut ha ki jaka lum jong ka Manipur, ha kaba ki jingïakynad hapdeng ki jaitbynriew bad ki jingshah thombor ba man ka por ki la bteng ban pynthut ïa ka jinglong jingman.