Tura, October 18: U Symbud Myntri Rangbah ka jylla u Bah Sniawbhalang Dhar, hynne ka sngi Balang ula plie ia ka jingrakhe iaka Jubili Ksiar jongka Meghalaya Board of School Education (MBOSE), Tura ha ka jingialang kaba la long ha Green Haven, New Tura.
Haba kren ha ka jingialang u Bah Sniawbhalang ula pynpaw ia ka jingsngewnguh ia ki jingjop jongka MBOSE ha ki 50 snem kiba la leit bad bynrap ba ka MBOSE kadei ka Board kaba biang tam ha ka ri baroh kawei.
Nalor kane ula pynpaw ba kala don ka jingiaid shakhmat bad ka jingkiew ha ka liang ka pule puthi ha ka thaiñ watla kala mad ia kiba bun ki jingeh hynrei ka Board kala lah ban kiew shaphrang bad u kyrmen skhem ba kan ioh kheit ia u soh ka jingjop ha ki snem kiban dang wan.
U Symbud Myntri Rangbah ula iaroh ruh ia ka jingleh bha jong ki khynnah na ki skul bapher bapher bad ula ai khublei ruh ia ki ophisar bad ia baroh ki nongtrei kiba la trei met bad mynsiem na ka bynta ka bha ka miat jong ki paidbah ka thaiñ.
Katba u Myntri ka pule puthi u Rakkam A Sangma ula ai khublei ia baroh kibadon haka longïing jongka MBOSE ha kane ka sngi kaba kyrpang bad ula ai khublei ia baroh kiba trei borbah na ka bynta ka Board ha ki 50 snem kiba la leit.
Ula pynkynmaw ruh ba ka jingseng iaka Board ha Tura, ka long kaban sah jingkynmaw khamtam haba ka Meghalaya kala ioh ia ka jylla lajong bad ula ong baka jingseng ia ka MBOSE ha Tura ka long ka jingkyrkhu ia ki paidbah ka rilum Garo bad ia ki paidbah ha ka jylla baroh kawei.
U Controller of Examinations, MBOSE Tura u Bah T.R.Laloo ula pyni ia ka jingiaid lynti jong ka MBOSE naduh ba la seng ia ka bad la pynkynmaw ia ka jingpyntreikam iaka Meghalaya Board of School Education Act ha u snem 1973, kaba long kaba kongsan ha kaban pyrkhing bad ban pyniaid ia ki jaka pule ha ka jylla.
Ia ka eksam kaba nyngkong eh jongka High School Leaving Certificate (HSLC) la pynlong ha u snem 1973 ha kaba 3797 ngut kila ialeh iaka eksamin bad kiba la pass ki long 38.3% percentage katba ha u 2023 ka pass percentage kala kiew sha ka 78%.
Ha shwa kane ka prokram u Bah Sniawbhalang ula pynher iaka lama jongka MBOSE, la pyllait paidbah iaka kot sah kynmaw bad la ot ruh ia ki cake jong ka jingdap 50 snem.
Ha kane ka jingialang la iadonlang u MLA, Rangsakona Constituency uba long ruh u Chairman ka Meghalaya Khadi and Village Industries, Subir Marak, Executive Chairman ka MBOSE u CP Marak, u Secretary ka Education Department u Ambrose Ch Marak, u Joint Director (Administration), Shillong Regional Office Bah Macdonald Marbaniang, ki heh ki haiñ bad kiwei kiwei.
