Shillong Nohprah 11: U Symbud Myntri Rangbah ka Jylla u Bah Prestone Tynsong ula ong ba ka thaiñ Riwar, ka long kaba donbok namar ba ka don ia ka shnong kaba khuid tam, ka um kaba sngur tam bad ka wah kaba khuid tam.
“Kane ka thaiñ ka don ia ka shnong kaba khuid tam, ka um kaba sngur tam bad mynta ia ka wah kaba khuid tam bad kane ka wah kadei ka Wah Rymben kaba don ha ka shnong Lapalang” ong u Bah Prestone haba kren ha ka jingialang paidbah kaba la long ha Madan Football, Lapalang kaba don ha Pynursla Constituency.
U Bah Prestone ula ong ba kane ka thain namar ba kadei kaba la pawnam na ka jingleh khuid jong ki nongshong shnong kumta kane hi kan khring bha ia ki nongjngohkai bad kumta kidei ban pyrkhat ban wanrah ia ki jingtei ki bapher bapher ha kane ka thain, khnang ba kan khring ia ki nongjngohkai ym tang ba kin shu wankai hynrei kin ioh ruh ban sahkai ha kane ka shnong kaban long ka jingmyntoi bad kaj ingkyrkhu ia ki nongshong shnong ban kamai kajih lyngba ka kam jngohkai.
U Bah Prestone ula kyntu ia ki paitbah ba kin long kiba iai shah ha kaba iadei bad ka jingshna ia ka surok Shillong-Dawki bad ula ong, shisien ba lah dep shna ia ka surok, ka jingwan tuid ki nongjngohkai kan jur bha ha kane ka thain ban ia ka thain Sohra bad ula kyntu ia ki paidbah ba kidei ban iatylli bad ban long kiba la pynkhreh ban pdiang sngewbha ia ki nongjngohkai bad kim dei satia ban shoh ne pyndik ia ki nongjngohkai hynrei kidei ban long ki briew kiba don ia ka akor bad burom.
Ula pynshlur ba kidei ban shim ia ki skhim ka sorkar kaba T.10 Lak ban buh ia ki homestay namar ka T.7 Lak kadei kaba la ai da ka sorkar bad T.3 Lak kadei kaba hap ban siew sha ka Bank.
U Bah Prestone ula pyllait paidbah ruh ia kawei ka kali kaban lum bad kit ia ki niut ki nier ha ka shnong Lapalang ban bteng ban pynneh ia ka khuid ka suba ha kane ka shnong.
Hadien kane ula plie ia ka jaka jngohkai Lapalang-Wah Rymben kaba la pyniaid da ka Dorbar Shnong Lapalang bad ka Lapalang Tourism Development Society.
Ha kane ka sngi la iadonlang ka MDC ka Nongshken ka Kong Grace Mary Kharpuri, ki heh ophisar ka tnad Tourism, ki riewrangbah ka thain, ki nongialam shnong bad ki paid nongshong shnong.
U Symbud Myntri Rangbah ryngkat bad ka MDC ka Nongshken, ki heh ophisar bad ki nongialam shnong kila iaid kjat sha ka jaka jngohkai bad kila sakhi da la ki jong ki khmat ia ka jingbun ki dohkha ha ka wah Rymben.
Kine ki dohkha kidei kiba la ri bad sumar da ka shnong bad kila khang pyrshah ban khwai dohkha ha kane ka wah kaba dei ka ‘Fish Sanctuary’ khnang ba pynroi ia ki dohkha khamtam eh ia ki khasaw.
U Bah Prestone ula shong ruh da ka lieng ban peitkai ia ka jingitynnad jong kane ka wah bad ki sawdong sawkun jong kane ka jaka jngohkai bad ula pynlut ruh ia kaba bun ka por ban iaid da ka kjat ha kylleng jong kane ka jaka jngohkai.
