Shillong, Naiwieng 27 : U Myntri Rangbah ka Jylla Conrad K Sangma, hynne ka sngi Nyngkong, ula plie paidbah ia ki project surok bad ki jingkieng ha ka jingialang kaba long ha madan Nengmandalgre.
Kine ki surok ki dei kiba la tip da ka L051-Nengmandalgre sha Daribokgre (Mandalgre) ba 35 kms, L042 Cherangre sha Sisobibra (Nengmandalgre to Gitokgre) ba 7.820 kms, ka jingkieng ba 51.68 metre halor ka wah Rongon bad jingkieng ba 51.68 metres halor ka wah Rongre.
Kiba la iadonlang ha kane ka jingialang ki kynthup ia u Symbud Myntri Rangbah ba khmih ia ka Tnad PWD Bah Prestone Tynsong, u Myntri Sorkar bad MLA ka thain Marcuise N Marak bad ka MP ka Tura Agatha K Sangma.
The Long Span Bridge at Chainage over Rongon river of Jakopgre to Nengmandalgre Road inaugurated today is a major upgrade from the battered hanging bridge that villagers would dangerously use during monsoons. This bridge will improve connectivity of the villages like Jakopgre,… pic.twitter.com/ouZSwIQuag
— Conrad K Sangma (@SangmaConrad) November 27, 2023
Haba ai jingkren, u Myntri Rangbah ula ong ba kine ki surok kiba la plie ki dei kiba kongsan bha na ka bynta ka roi ka par jong ka thain.
“Ki surok ki long kiba kongsan bha ia ka roi ka par jong kino kino ki jaka bad khlem ki surok, ki kam pynroi ruh kin ym poi” ula ong.
Haba ai khublei ia ka MP Agatha K Sangma kaba la iarap ban wanrah ia kane ka surok lyngba ka PMGSY jog ka Sorkar Pdeng, ula ong ba ka Meghalaya ka dei kawei na ki Jylla ba pyntreikam bha ia ka skhim PMGSY.
U Myntri Rangbah ula kren ruh ia ki 5 tylli ki mat treikam ba hakhmat ka Sorkar Jylla. “Ngi don san tylli ki mat treikam ba hakhmat eh bad kita ki long ka surok ia baroh, ka bording ia baroh, ka Iing ia baroh, ki jingtip ia baroh bad ka um ia baroh. Ngi la treikam mynta ha kata ka rukom kaba ngin lah ban kynthoh ia kane ka thong ha kine ki khyndiat snem ban wan” ula ong.
U Conrad u pyntip ba ha u snem 2023-2024, hapoh ka skhim PMAY, ka Sorkar kala pyllait pisa haduh T.1600 klur na ka bynta ban shna ia ki 1500 tylli ki Iing bad ula ai khublei ia kane ia ka MP kaba la shimkhia ban pynurlong.
Shuwa kane, u Symbud Myntri Rangbah Bah Prestone Tynsong, ula ong ba ki surok ki dei ki jingkyrkhu ia ka ioh ka kot, ka koit ka khiah, ka pule dangle bad ki kam ba manla ka sngi jong ki briew kiba don ha ki shnong ba iaid kine ki surok haba ong ba ka Sorkar kala pynthikna ba ka roi ka par ka poi ha manla ki shnong.
U Bah Prestone ula iathuh ba hapoh ka PMGSY, ka Jylla kala lah ban pyntrei haduh 1200 Km ka surok ha kylleng ki jaka. Ula pan ia ka jingiatreilang jong ki Nokma, Sordar bad ki trai jaka haba iadei bad ka jingiadie iathied jaka ban shna ia ki surok na ka bynta ka bha ka miat jong ki paidbah ka Jylla.
Ka pisa bala mang ia ka Jingkieng halor ka wah Rongre bad ka surok Jakopgre sha Nengmandalgre ka long T. 176.969 lak bad ia ka jingkieng halor ka wah Rongon bad ka surok Jakopgre sha Nengmandal ka long T. 151.140 lak.
