Williamnagar, May 28: Kum shibynta ban pynkhlain ia ka synshar khadar sha ki shnong ki thaw bad ban wanrah ia ka jingiajan hapdeng ki bor sorkar bad ki paidbah, ka Sorkar Jylla kala sdang suki suki ban pynkylla ia ka jingtei kat kum ki juk ba mynta bad ia ka rukom treikam khamtam eh ha ki jaka kiba don sha ki jaka kyndong bad ba jngai ia kiba la shu ieh bad kyntait ia ka jingdonkam ba kongsan ka jong ki.
Kum shi bynta jong kane ka sienjam, u Myntri Rangbah ka jylla Conrad K. Sangma hynne ka sngi Balang, ula plie ia ki artylli ki Block Integrated Development Complex ha East Garo Hills district, kawei ha Songsak bad kawei ha Dambo Rongjeng.
Kine ki Complex kiba kidei ki jingtei na ka Special Assistance to States for Capital Investment (SASCI) scheme, kaba thmu ban pynthymmai ki jingtei kiba la rim jong ka sorkar bad ban kyntiew ia ka rukom ai jingshakri.
Haba kren ha ka jingplie ia ka Songsak C&RD Block complex, u Myntri Rangbah ula pynpaw ia ka kam wanrah jingkylla lyngba ka SASCI scheme. “Kane kadei kawei na ki khubor kiba bha jongka SASCI (Special Assistance to States for Capital Investment) scheme kaba la ailad ia ngi ban kyntiew ia ka Block ophis ka jong ngi, ha kaba bun kila shah ieh bein ha ka jingjot da ki phew phew snem” ula ong.
Ka Meghalaya ka don mynta 56 tylli ki Community and Rural Development (C&RD) Blocks bad kiba bun mynta kila iohi ia ka jingshna pynbha bad jingmaramot kaba la sahteng la slem bha.
Ha Dambo Rongjeng C&RD Block, u Myntri Rangbah ula ban jur ia ka jingiohi jngai jong ka jylla ha kaban shna pynbha ia ki jingtei ki bapher bapher.
“Ka jingthmu hi ka long ban thaw ia ki jaka treikam kiba biang ki ban pynkupbor ia ka kynhun ka jong ngi ha ki shnong ki thaw ban ai ka jingshakri kaba bha tam ia ki paidbah” ula ong.
Ula pynbna ruh ia ki jingthmu ban tei ia ki jaka sah jong ki nongtrei ha kylleng ki jaka kiba don ha ka jylla ban pynbiang ia ka iing bad ban kyrshan ia ki nongtrei sorkar kiba ai jingshakri ha ki jaka kiba don ha nongkyndong.
Kumban shu kdew, ka sorkar Meghalaya kala bhah T.120 Klur naka bynta ban kyntiew bad shna pynbha ia ki Ophis jong ki block ha kylleng ka jylla. Nalor kane u Myntri Rangbah dang shen ula pynbna ruh ban bhah tyngka na ka bynta ban tei ia ki building jong ki 10 tylli ki C&RD block kiba thymmai.
