Shillong, Jylliew 17: U Myntri Rangbah ka Jylla Meghalaya Conrad K Sangma ha ka sngi Ba-ar, u la plie paidbah ia ki 125 tylli ki Community Centre ha kylleng ka Garo Hills, kiba la bei pisa na ka Meghalaya Livelihood and Forest Ecosystem Management Project (MegLIFE).
Ha kane ka prokram la wan ban ïashimbynta da u Lamphang iingdorbar thawain u Thomas K Sangma, ki Myntri Sorkar kynthup u Marcuise Marak, u Rakkam A Sangma, u AT Mondal lem bad katto katne ngut ki MLA.
Ïa ki Community Centre la plie lyngba ki kor digital na Dobakol Awemong, kaba hap hapoh ka Baghmara C&RD block, South Garo Hills, ha kaba u Myntri Rangbah ka jylla u la don lang ban sakhi ïa kane ka jingplie paidbah.
Iaki Community Centre la shna ha ka jinglut kaba T.24 lak ha ( T.13 lak na ka projek bad T.11 lak na ka Jylla) daka jingthmu ban ai ka rynsan ïa ki paidbah ba kin leh ia ki kam bapher bapher, kynthup ïa ki jingthmu kiba lah ban pynmih pisa.
Ka projek MegLIFE kadei kaba la bei pisa da ka Japan International Cooperation Agency (JICA) daka jingthmu ban pynneh pynsah ia ki khlaw ki btap bad ban kyntiew ia ka rukom im ha ki 500 tylli ki shnong ha kylleng ki 12 tylli ki district jong ka jylla Meghalaya.
Ka projek kam shym la shna tang ia ki Community Centre na ka bynta ki paidbah hynrei ka la sdang ruh ia ki katto katne ki kam kiba lah ban pynioh kamai, kynthup ia ka jaka pynmih symbai, ka jingthung jingtep, ki irrigation check dam kiba rit, ki pung, ki tank plastic, bad ki tank buh um da ka dewbilat.
Haba kren ha kane ka sngi, u Myntri Rangbah ka Jlla u la ong ba kane ka projek ka phaikhmat eh ban pynim biang ia ki khlaw ki btap kiba la jot rathai, ban pynkhlain ia ka jingpyniaid ia ki marpoh khyndew, bad ban kyntiew ia ka jingim haki thain nongkyndong.
U Conrad u la pyntip ba kane ka projek ka ai bor ia ki paidbah ban shim ia ka jinglong trai ia ki khlaw ki btap, ki jaka, bad ki tyllong um.
“Ngi kwah ban tei ia ka imlang sahlang kaba sdang ia ka jingiarap na ka bynta ka jingim kaba neh junom. Lyngba ka projek MegLife, ngi thaw ia ka jingsngewthuh ia ka mariang bad pynthikna ia ka ioh ka kot kaba neh lyngba ki kam bapher bapher” la ong u Conrad.
Hapoh kane ka projek, ka thong ka long ban don 452 tylli ki community centre ha kylleng ka jylla Meghalaya.
Da kaba ai khublei ia ka JICA kaba la ai ka jingkyrshan, u Myntri Rangbah u la pyntip ba yn sa pyndep sa 150 tam ki community centre ha Garo Hills.
Haba kren halor ka jingdonkam jong ki Community Centre ban kyntiew iaka roi ka par haki thain kyndong, u Myntri Rangbah u la ong ba kane ka Project kan kyntiew ia ka roi ka par jong ka imlang sahlang bad ban kyntiew ia ki lad kamai jakpoh haba iathuh ba ka jingthmu jong ka projek ka long eh ban pynkupbor ia ki paidbah bad ka jingroi jingpar kaba neh junom.
Ha kane ka sngi u Myntri Rangbah ula ïakren ruh bad ki paidbah kiba la wan sha kane ka prokram da kaba pyndonkam da ka kor digital.
.){kind=link}