Shillong Nailar 21: U Myntri Rangbah ka jylla u Conrad K. Sangma hynne ka Lah Sngi U Blei, ula plie ia ka ophis treikam kaba thymmai jongka Williamnagar Municipal cum Market Complex ha Soil Bazar, Williamnagar.
Ha katei ka jingplie paidbah la iadonlang u Myntri ka tnad PHE u Marcuise Marak, u MLA ka Rongjeng u Jim Sangma, ki heh ophisar sorkar bad kiwei kiwei.
Haba kren haka jingialang u Myntri Rangbah ula ong ba kala don ka jingdawa kaba jur ia ki jingtei ki bapher bapher ha kylleng ka jylla bad ka sorkar ka pynthikna ba kan pyntreikam ia kitei ki projek hapoh ka por kaba la buh.
“Ka sorkar jong ngi kala shimkhia ban pynthikna ban don iaki jingtei kiba long palat ban ia ki jingtei da ka bor met. Kadei ka jingkitkhlieh ban pynkupbor ia ka imlang sahlang, ban kyntiew ia ka ioh ka kot bad ban thaw ia ki lad ki lynti na ka bynta ban ai iaka jingim kaba bha ia iwei pa iwei i nongshong shnong” ong u Conrad.
“Ka sorkar jong ngi ka ithuh ia ki bynta kiba kongsan ba ki jingtei bad ki surok ki lah ha kaba pyniasoh ia ka imlang sahlang, ban kyntiew iaka ioh ka kot bad ban plie lad na ka bynta ban ioh iaka jingim kaba bha. Ka long kaba kongsan ia ngi ban pynthikna ba iwei pa iwei i nongshong shnong kin ioh jingmyntoi na kitei ki kam pynroi. Ngi don iaka jingangnud ba ka jylla Meghalaya, kan dei kaba ki briew kin ioh ia ki jingdonkam katkum kane ka juk kaba mynta, ka pule puthi kaba paka bad ki jaka ai jingsumar kiba paka” la ong u Myntri Rangbah.
Ha ka jingplie paidbah iaka Williamnagar Municipal Office cum Market Complex, u Myntri Rangbah ula ong ba kane kadei ka sienjam ban pynbiang iaka jingdonkam jong ki nongshong shnong.
“Kane ka iaid ryngkat bad ka jingiohi jngai ban kyntiew iaka rukom im bad ia ka ioh ka kot jong ki paidbah ka Meghalaya,” ula ong bad ka pyntip ba ki don bun ki bynta kiban leh ha ka thaiñ Williamnagar, kiba kynthup iaka jingshna pyndep iaka surok, ka jingtei iaka mini stadium bad ban pynitynnad bad pynbhabriew ia kane ka thaiñ.
Ula pynbna ruh ba ka sorkar kan shna pynbha iaka Rongrenggre Higher Secondary School, kawei na ki skul kaba la rim tam ha ka district, ban pynthikna ba kan don ka jingpynbha ia kane ka jaka pule naka bynta ka bit ka biang jong ki khynnah pule.
“Ban kyntiew iaki jaka pule, kadei ka thong kaba hakhmat eh ka jong ngi bad ka jingshna pynbha iaka Rongrenggre Higher Secondary School ka pyni iaka jingthrang ka jong ngi ban pynbiang iaka pule ka puthi kaba paka na ka bynta ki samla” ong u Conrad.
Ha kane ka sngi u Myntri Rangbah ula pynpaw ruh ha kaba iadei bad ki projek kiba dang iaid shakhmat kiba kynthup iaka jingtei iaka Williamnagar College kaba la jan dep artad bad ka jingtei iaka Mini Stadium ha Williamnagar.
U Myntri Rangbah ula leit ruh ban jurip iaka surok kaba la shna thymmai ha ka shnong Rangmal Badim bad Chidekgre bad ula sam ruh iaka Digital Learning Aids (M-Tab) sha ki khynnah pule jong ka Williamnagar lyngba ka Chief Minister’s Digital Learning Aid for Students Scheme bad ula aiti ruh ia ki tynrai Cinnamon sha ki nongrep jongka East Garo Hills District kum shi bynta jong ka Spice Mission kaba thmu ban pynkup bor ia ki nongrep.
Nalor kane ula pyllait paidbah ruh ia ki 3 tylli ki kali Bolero Pickup lyngba ka Mission Organic Value Chain Development of North Easter Region, Phase -I.
Pule ruh: Shong jingialang ka Meghalaya Bharat Scouts & Guides
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
