Shillong, Naitung 25: U Myntri Rangbah ka Jylla u Conrad K Sangma, hynne ka sngi Palei, ula plie paidbah ia ka True North Swimming Academy kaba don ha Lapalang ia kaba la tei lyngba ka jingioh ia ka jingkyrshan na ka CM Elevate Program.
Haba kren ha ka jingialang u Conrad K Sangma, ula ong, ba u dap da ka jingsngewkmen ban iohi ia ka rukom shna kaba la pynwandur bha, kaba don ia ka kyrdan ha ki jingtei bad ka rukom phaikhmat kaba long bniah.
“Nga dap ruh da ka jinglyngngoh ia ka jingdon mynsiem jong ka kynhun kaba la sdang ia kane ka projek bad ia u soh ka jingjop kaba ngi iohi mynta hakhmat jong ngi kadei ka nuksa kaba khraw, kaba ngi lah ban pynurlong lada ngi aiti lang ia la ka met bad mynsiem ha kaei kaba ngi ngeit” ula ong.
Ula bynrap ba dei ban don ia ka kolshor kaba khlain bad ka jinglong jingman kaba biang ha ka kam sengkam ban pyndap ia ka jingdawa jong ki samla kiba wad kam ban trei man la ka snem.
“Ha u snem ba la lah, ngi lah pyllait 2840 tylli ki projek hapoh jongka CM Elevate program bad pyllait T.146 Klur sha ki nongseng kam bad ka thong ka jong ngi ka long ba ha kine ki 2-3 snem ban wan dei ban kynjoh sha ki 20,000 ngut ki nongsengkam ha ka jinglut kaban kot T.500 Klur na ka bynta ki kam bapher bapher” ula bynrap.
U Myntri Rangbah ula kyntu ia ki nongsengkam ba kim dei ban sheptieng ia ki jingma ha kaban sdang ia kano kano ka kam khaii hynrei kidei ban trei borbah ban ioh kheit ia u soh ka jingjop.
“Ki khynnah ki jong ngi kidei kiba tbit ha ki jingialehkai ki bapher bapher hynrei ngi hap ban peit kumno ban kyntiew ia ka ioh ka kot ne ka aikam aijam na katei kumta ka jingpyniasoh lang hapdeng ka jingsengkam bad ki kam ialehkai ka long kaba kongsan bha” ula ong.
“Nga ngeit skhem ba kane ka jaka kan lah ban ai bad pynbiang ia ki nongjngi, ba ngi donkam ban lah ban ioh ia ki takma ha ka National Games ha u snem 2027,” la pynkut u Myntri Rangbah ryngkat bad ka ai khublei ia ka kynhun jongka True North.
Ka True North Centre kala ioh pdiang T.1 Klur lyngba ka CM Elevate program.
U Gary Lamare, uba dei u nongseng jong ka kynhun True North ula pyntip ba kane ka centre ka don ruh ia ka Gym hynrei ka jingpynleit jingmut kan long ha ka swimming academy.
Ula iathuh ruh ba ia ka swimming pool la khmih bad peit da ki Instructor kiba la ioh ia ka jingithuh bad kiba la pyntbit bha, khnang ba kin pynthikna ba kan don ka jingshngain ia baroh ki dkhot.
