Ampati, K’lyngkot 14 : Khatduh ka Jylla Meghalaya kala dei ban sngew sarong ba hadien 50 snem ka jingioh iala ka jong ka Jylla, kala ioh bad don la ka jong ka State University ne ka Skukbah la ka jong.
Colleges in Meghalaya have been affiliated to NEHU all these years & this will give them the opportunity to affiliate to our State’s own University.
— Conrad Sangma (@SangmaConrad) January 14, 2023
Kane ka Skulbah ka Jylla (State University) ka dei ka Captain Williamson Sangma State University (CWSSU) bad la plie paidbah ia ka hynne ka sngi saitjain da u Myntri Rangbah ka Jylla Conrad K Sangma ha ka jingialang bala pynlong hapoh ka Campus ha Shnong Balalgre, South Wesr Garo Hills District.
U Myntri Rangbah ka Jylla ula ai burom ia kane ka State University ba nyngkong eh ka Jylla kaba la ai ha ka kyrteng jong u Myntri Rangbah ka nyngkong eh ka Jylla, u Captain Williamson Sangma, sha ki paidbah ka Jylla ha ka jingdap 50 snem jong ka Jylla.
U Chief Adviser jong u Chief Minister, Thomas A. Sangma, Commissioner & Secretary, Education, B.D.R. Tiwari, Secretary, Education, Ambrose Ch. Marak, Vice-Chancellor CWSSU, R.D. Shira, Tura Municipal Board Chairman, J.D. Sangma, Chairman KVIB, Subir Marak, Registrar, CWSSU, bad ki Khlieh jong ki jaka pule, ki Ophisar ka South West Garo Hills bad ki Nokma lem bad ki paidbah ka thain, kila iadonlang ban sakhi ia kane ka jingplie paidbah ia kane ka skulbah ka Jylla.
Haba ai jingkren, u Myntri Rangbah ula ong ba kane ka skulbah ka dei ka Technical University kaba don tang katto katne ki Courses (lain pule) hynrei namar ki katto katne ki daw bad ki jingtynjuh ba ngi iakynduh ha kine ki snem bala leit noh bad ban pynthikna ba ka Jylla kan don noh la ka jong ka skulbah, ka Kynhun Myntri kala rai ban pynkylla ia kane ka Technical University sha ka State University ba pura.
“Ngi la shim ia ki sienjam ba donkam baroh bad ka kam kala iaid ha kaban pynmih ia ka Ordinance ka ban sa pynbna paidbah da u Lat ka Jylla” ula ong.
Haba jubab ia ki jingeh bala pynsngew da u Vice Chancellor ba iadei bad ka jingduna ki jingtei hapoh ka Univerisity, u Myntri Rangbah ula kubur ba ki jingtei kim pat biang satia. “Ngi donkam ban khmih kumno ban shna ia ka blueprint bad ka master plan bad pynthikna ba kane ka University kan don ia baroh ki jingdonkam kiba donkam da ki samla pule bad ba ka University kan treikam ha ka rukom kaba dei. Nga kular ha phi baroh ba kane ka dei kaei kaba ngi plan ban leh” ula ong.
Haba sam jingtip halor ka jingshna pynbna ia ka campus, u Conrad ula ong “Nalor ki kam barit baria kum ka kynroh kaba la dep mang pisa mynta bad la khmih lynti ruh ban sa sdang pyntrei noh shen, ngi la dep mang pisa ruh ban pyniasoh surok n aka surok bah sha ka campus bad ia kane ka Building hangne ruh ngi khmih lynti ban sdang pyntrei noh shen.
Kumba ai jingmut, ngi la dep sdang ia ka kam kat kum ka jingiohi jngai, ka plan ba hadien habud ba shano kane ka university kan poi ha ki snem ban wan”.
“Ki dang don bun ki kam ba ngi hap ban leh ban pynthikna ba ngi pynkhlain ia baroh ki kam bad ban pynlong ia kane ka university, ka State University lajong kum kawei na kaba biang bad hadien habud, kum ka university kaba biang tam hapoh ka thain” ula bynrap.
Da ka jingdon iala ka jong ka Univeristy, kane kan ailad ia ki samla pule ka Jylla ban iaid lait ia ka Comman University Entrance Test (CUET) bad ailad ruh ia ki College jong ka Jylla ba kin jied ha ka ban pyniasoh bad la ka jong ka State University ban ia ka NEHU.
