Shillong, K’lyngkot 14 : Ka Tnad Meghalaya Transport Corporation (MTC) ka Sorkar Jylla, hynne ka sngi saitjain, kala iasoi ia ka soskular bad ka Spicejet ban pynher ia ka liengsuin kamai beit beit hapdeng ka Shillong bad ka Delhi.
Ia kane ka soskular la iasoi ha ka jingiadon ryngkat jong u Myntri Rangbah ka Jylla Conrad K Sangma. Kane ka liengsuin kan her kamai arsien shitaiew kata ha ka sngi nyngkong bad sngi thohdieng.
Lah ban kdew ba kane ka jingshimkhia ban pynher ia ka liengsuin kamai Delhi-Shillong-Delhi ka dei ka kam jong ka Sorkar Jylla naduh u snem 2020. Haba nyngkong, ka Big Charter Pvt Ltd (Flybig) kala shimti ban pynher ia ki liengsuin kamai.
Ka Flybig kala pyndonkam da ka Liengsuin Bombardier Dash 8 Q400 kaba ju pyndonkam nyngkong da ka Spicejet.
Hynrei, ka Flybig kala pynpaw hadien ia ka jingbym lah ban pynbteng ia ka jingkamai. Kumta, ka Sorkar Jylla kala pynlong ia ka jingiakren la bunsien bad ka Flybig bad ha kajuh ka por ban wad ia kiwei pat ki lad ki lynti. Khatduh ia ka jingiateh soskular bad ka Flybig la pynkut noh.
Ha kajuh ka por, ka Spicejet kala wan iakren hi dalade bad ka Sorkar Jylla bad kala tyrwa hi ban pynher ia ka liengsuin na Delhi-Shillong-Delhi kat kum ki kyndon jong ka MTC. Ka Spicejet ka don haduh 23 tylli ki liengsuin 23 Bombardier Dash 8 Q400 bad da kane kajuh ka liengsuin yn pyndonkam ha ka jingkamai na Delhi-Shillong-Delhi.
La khmih lynti ba ka jingsdang pynher ia kane ka liengsuin kan long naduh u bnai Rymphang 2023.
Ka Spicejet kala khmih lynti ban pynurlong ia ka jingshimkhia jong ka Sorkar Jylla bad ban pynurlong ia ka jingangnud jong ki paid nongshongshnong ka Meghalaya ban don ia ka liengsuin ba kamai beit beit na Shillong sha Delhi.
