Shillong, Risaw 31 : U Myntri Rangbah ka Jylla Conrad K Sangma ha ka sngi Thohdieng, ula plie paidbah ia ka samoi long klas ba nyngkong eh jong ka Shillong Government College of Engineering ha ka college campus ha Mawlai, Shillong.
Kane ka jingplie ka dei u mawmer ba khraw ha ka kam pule dangle jong ka Higher and Technical Education ha Meghalaya.
Kiba la iadonlang ki kynthup ia u Symbud Myntri Rangbah Bah Prestone Tynsong, Myntri kam Pule Puthi Bah Lahkmen Rymbui, Myntri ka Tnad Arts & Culture Bah Sanbor Shullai, Chief Secretary Dr Shakil Ahammed bad kiwei kiwei.
Haba ai jingkren, u Myntri Rangbah ula niew ia kane ka sngi kum ka sngi ban sah khana ia ka Meghalaya, haba ong ba ha ki snem ban wan naduh mynta, ki briew kin phai dien sha kane kum ka sngi ka jingsdang jong ka Government Engineering College ba nyngkong eh. Ula pynpaw ia ka jingsngewnguh ia baroh kiba la synniang ban pynurlong ia kane ka project kaba la ap slem bha, kynthup ka Tnad Pule Puthi, ki Myntri Sorkar,ki Ophisar bad ki nonghikai.
“Ban sdang slem kam mut sati aba ngin shah ieh shadien” ong u Myntri Rangbah haba ban jur ba ki technology kin iarap ia ka Meghalaya ba kan kiew shaphrang ha ka roi ka par, kumba leh ka India ha ka Banking sector lyngba ki buit treikam kum ka UPI bad Aadhaar.
Ula ai nuksa ia u Engineer Khasi ba dang khynnah na Shillong, uba la shna dalade ia ka software ba pyndonkam ban pyn kynriah ia ka S/4HANA System –ka iew pyrthei ba $10 billion- da kaba pynrung lang ia ka “Speed of Light” concept ka Nvidia ban pynduna ia ka por leh test na ka shisnem tang da ki bnai. “Kane kala jia mynta hangne ha Shillong” ula ong haba bynrap ba ki Heh Ophisar na Nvidia kila dep wan sha Shillong ban tyrwa iatreilang bad pynheh ia ka kam.
Ula pynbna ruh ba ka jinghikai ia 50 ngut ki samla kala sdang ha kane ka bynta, da ka jingthmu ban nang pynheh sha ka 200-300 ngut. Ula ong ba kum kine ki kabu kin plie lad ia ki samla ka Jylla ha ka liang ka Artificial Intelligence, Computing bad Engineering.
U Myntri Rangbah ula iathuh ruh ba ka bynta kaba ar jong ka Shillong IT park yn sa plie noh ha u Nohprah, ka ban don 3000 seat bad ka kompani na UK kala pynpaw ia ka jingkwah ban sdang ia ka jingtreikam wat hashuwa ban pyllait paidbah ia ka.
Haba pynpaw ia ka jingroi ka Meghalaya ha ka liang ka Technology, u Conrad ula pynbna ba ka National Artificial Intelligence Conference na ka bynta ka thain Lam Mihngi kan sa long ha Shilong ha ka 3-4 tarik Nohprah, 2025, ka ba long u mawmer ba kongsan na ka bynta ka Jyllla.
Hadien kane, ula kren halor ka jingslem ban ioh scholarship ki samla pule, haba pynpaw ba ka Meghalaya mynta kan pyllait lypa noh ia ka song pisa, khlem da ap shuh ia ka jingpyllait pisa ka Sorkar India.
Ula pyntip ba ia ka Chief Minister’s Scholarship Scheme yn sa pyllait noh hashuwa ka Khristmas bad ia ka Scholarship ba bei pisa ka Sorkar Pdeng yn sa pyllait noh wat hashuwa ban phah pisa ka Sorkar India.
Haba pynskhem ia ka jingkut jingmut ka Sorkar ban kynshew ha ka jingdon ki nongshongshnong ba lah ban trei ia kino kino ki kam, u Myntri Rangbah ula ong “Hooid, ngi donkam ia ki surok bad ki jingtei, hynrei haba kut, ka dei ka jinglah jong ki briew jong ngi ka ban batai ia ka jingkhlain jong ka Jylla”. Ula pyntip ruh ba ka Shillong Medical College ka long kaba la khreh ban plie noh bad ka dang ap ia ka jingpynthikna la ka long na u Myntri Rangbah Duh lane u Myntri kam Pohiing ba un plie ia ka hapoh kine ki khyndiat taiew ban wan.
Kiwei pat kiba la ai jingkren ki kynthup ia u Symbud Myntri Rangbah Bah Prestone Tynsong bad u Myntri kam Pule Puthi Bah Lahkmen Rymbui nalor kiwei kiwei.
Ha kane ka sngi, u Myntri Rangbah ula plier uh ia u maw kyrteng kum ka dak ka jingplie ia kane ka samoi long klas bad ruh ula plie ia u maw nongrim ban shna ia ka RCC building ba thymmai ha Shillong Polytechnic. Kane ka project ka kynthup ia ka workshop, laboratories, examination centre, smart classroom, teachers rooms, kaba la bei tyngka da ka NEC hapoh ka DoNER Ministerka Sorkar India.
