Shillong, Naiwieng 11 : U Myntri Rangbah ka Jylla Conrad K Sangma hynne ka sngi thohdieng, ula plie paidbah ia ka Rongjeng Civil Sub Division ha East Garo Hills hadien ka jingdawa bala kot 40 snem kynthih jong ki paid nongshongshnong.
Ia kane ka Civil Sub Division ba thymmai la plie paidbah ha ka jingiadon ryngkat u Symbud Lamphang ka Iingdorbar Timothy D Shira, ki MLA Jim Sangma, Thomas Sangma, Brening Sangma, Rupert Momin bad Pongseng Marak.
Ka Rongjeng kala ioh ia ka Administrative Unit ha u snem 2017 bad san snem hadien, la kyntiew kyrdan ia ka sha ka Civil Sub Division lyngba ka notification bala pynmih da u Lat ka Jylla.
Kane ka Civil Sub Division kan pyniaid noh ia ki kam ki jam jong ka Rongjeng C&RD Block, kaba kdup ia palat 180 tylli ki Shnong hapoh jong ka.
Haba kren ha ka jingialang, u MLA ka thain Jim Sangma ula pynpaw ia ka jingsngewnguh ia u Myntri Rangbah ka Jylla halor ka jingpynurlong ia ka jingangnud bala slem bha jong ki paidbah. Ula iaroh ruh halor ka jingpyndep ia ka jingkwah jong u (L) Purno A Sangma, uba la iakhun borbah ban thaw ia ka Rongjeng Civil Sub Division.
U Myntri Rangbah ula plie paidbah ia u motthoh khyrteng bad aiti ia ka notification sha u SDO ba thymmai ka Division u Reuben Momin bad ai khublei ruh ia ki paidbah ka thain kiba la iamih paidbah ban sakhi ia kane ka sngi sah jingkynmaw.
“Nga kmen eh ban pynurlong ia ka jingangnud bala slem bha jong ki paidbah” ong u Myntri Rangbah haba ai burom ia kane ka Sub Division sha ki paidbah.
“U Purno A Sangma u don ka jingiadei ba iajan bha bad ki paidbah ka Rongjeng. Ka Sorkar kala treikam da ka thong ban wanrah ia ka jingkylla bad ka jingkiew shaphrang jong ka Jylla” ula ong.
“Ka dei ka jingangnud jong ka Sorkar MDA ban pynjan ia ka jingshakri ka Sorkar sha u paidbah. Ngi dang don ka jingthmu ban kyntiew kyrdan ia kiba bun ki Block bad ki Sub Division khnang ba ki paidbah kin ioh ia ki jingshakri bapher bapher jong ka Sorkar” ula ong.
Haba kren bniah halor ki jingkut jingmut jong ka Sorkar ban wanrah ia ka jingsynshar kaba bha bad ka jingshakri ruh kumjuh, u Myntri Rangbah ula pynkynmaw ia ka jingkren jong u Myntri ka Sorkar Pdeng ba khmih ia ka Jal Shakti u Gajendra Singh Shekhawat ha ka sien wan iuhkjat dang shen, uba la niew ia ka Jylla kum kaba kiew bha shakhmat ha ka jingpyntreikam ia ka Jal Jeevan Mission ha ka Ri.
“Kiwei ki Jylla ha ka ri ki dei ban shim nuksa na ka Meghalaya” ong u Myntri , pyntip u Myntri Rangbah ha ka jingialang haba batai ia ki jingkut jingmut ba don jong ka Sorkar na ka bynta ki paidbah ba kin im kham bha.
Ula pyntip ruh ba ka Meghalaya kala leh bha ha kiba bun ki jingshakri ba kynthup ia ka jingpyntreikam ia ka MGNREGS, ha kaba ka jingpynlut ha ka shisnem kala kiew sha ka T. 1600 klur.
Haba kren halor ka Focus bad Focus plus, u Myntri Rangbah ula ong ba ka Sorkar kala wanrah ia kine ki skhim ban pynthikna ia ka jingbiang ka kamai kajih jong ki paid nongrep bad ka dei ka jingkut jingmut jong ka Sorkar ban pynbteng ia kine ki skhim sa ha kine ki 10 snem ban wan.
