Shillong, Iaiong 15 : U Myntri Rangbah ka Jylla Conrad K Sangma ha ka sngi Balang, ula plie paidbah ia ka PRIME Hub ba thymmai ha Pyndenglawar, Nongstoin, kaba long ka dak ka jingpyrshang jong ka Sorkar ban pynkhlain ia ka lad kamai jakpoh ha ki jaka nongkyndong bad ka jingpynmih ia ki mar bam bapher bapher lyngba ki marrep ha West Khasi Hills.
Ha kane ka jingialang la iadonlang u MLA ka Nongstoin Bah Gabriel Wahlang, MLA ka Rambrai RG Momin, ki Ophisar ka District bad kiwei kiwei.
Haba ai jingkren, u Conrad ula ong ba ka jingtreikam jong ka PRIME (Promotion and Incubation of Market-driven Enterprises) hub ha kylleng ka Jylla Meghalaya ka dei kaba thmu ban plie ia ki lad ban kyntiew ia ka ioh ka kot ha ki jaka nongkyndong.
“Ki don kyrhai ki lad ki lynti ha ki shnong jong ngi. Ki briew kila pynmih ia ki mar bapher bapher, hynrei ki duna pat ban ioh ia ki jinghikai pyntbit, ki technology, ka jingsong mar, bad ki iew” ula ong haba bynrap, kane ka hub kan shakri kum ka jaka ban hikai pyntbit ia ki sap treikam, ai jinghikai bad ka jingkyrshan ia ki kynthei, nongrep bad ki samla.
Kane ka jingtei ba T.5.92 klur ha Pyndenglawar, kan dei kaba pyniaid da ka Pyndenglawar Integrated Village Cooperative Society (IVCS).
Kane ka hub la khmih lynti ba kan ai jingmyntoi ia palat 3500 ngut ki nongrep ha ka thain, ka ban kyntiew ia ka jinglah pynmih mar reo jong ki, pynioh ia ki iew ba kham bun bad kiwei kiwei.
