Shillong, Risaw 18: U Myntri Rangbah ka jylla Conrad K. Sangma hynne ka sngi Ba-ar, ula plie paidbah iaka ophis treikam kaba dang shu dep tei jong ka Krishi Vigyan Kendra kaba don ha Mawthadraishan, Eastern West Khasi Hills.
I encourage the officials to make it a Centre of Excellence and tailor their services to address the requirements of the area, and through their research and knowledge to further help our farmers to grow. pic.twitter.com/rWdF92GfyQ
— Conrad Sangma (@SangmaConrad) October 18, 2022
U Myntri Rangbah ula ong, ka jingplie ia katei ka ophis treikam ka dei kyrpang eh naka bynta ki nongrep bad kan iarap shibun ha kaban kyntiew iaka rukom treikam jongka KVK ha katei ka thaiñ ha kaban ai jingkyrshan ia ki nongrep ban leh ia ki kam kiba iadei bad ka rep ka riang.
“Ki nongrep ki don kumba 70% haka jingdon ki nongshong shnong ha ka jylla bad kiba bun ki longïing ki im da ka rep ka riang. Kumta donkam ban pynthikna ba ngi dei ban ialeh ban bhah tyngka khambun haka kam rep kam riang naka bynta ka bit ka biang jong ki nongrep haka jylla” ong u Conrad haba kren haka jingialang.
Ula ong, lyngba ka jingpyndonkam ia ki kor ki bor katkum ka juk stad saïan bad ki kor teknoloji, ka sorkar kan lah ban pynurlong iaka thong ban kyntiew iaka ioh ka kot jong ki nongrep.
“Ha kine ki 4.5 snem kiba la dep, ka sorkar kala lah ban wanrah iaki prokram kum ka Jackfruit Mission, Mushroom Mission, Turmeric Mission, Ginger Mission, Aroma Mission, Spice Mission bad kiwei kiwei. Ngi la plie ia kiba bun ki lad ki lynti na ka bynta ki nongrep ki jong ngi” ong u Myntri Rangbah ka jylla .
Ula ong ka sorkar kala wanrah bad pyntreikam ia ki prokram ki bapher na ka bynta ka jingmyntoi jong ki nongrep bad da kaba pyndonkam ia ki kor teknoloji kiba dei bad ka jingstad saïan yn lah ban kyntiew shuh shuh iaka rep ka riang ha ka jylla baroh kawei.
“Kane kadei ka juk jong ki kor teknoloji bad ka juk stad saïan, kumta ki KVK kin don iaka bynta kaba khraw ha kaban pynthikna ban ai iaki jinghikai kiba paka ia ki nongrep bad ba kin pyndonkam ia ki kor ki bor kiba dei” ong u Conrad.
Ha katei ka jingialang la iadonlang u Myntri ka tnad Water Resources Bah Brolding Nongsiej uba long ruh u MLA ka Mawthadraishan, ki heh ophisar sorkar bad kiwei kiwei.
