Mendipathar, Nailar 13: Ha ka jingpyrshang kaba bteng ban kyrshan ia ki nongrep ka jylla ba kin ioh ia ka lad kamai kaba neh bad ban kyntiew ia ka kamai kajih jong ki, u Myntri Rangbah ka jylla Conrad K Sangma, hynne ka sngi Ba-ar, u la plie ia ka Oyster Mushroom Cluster ha Mendipathar, North Garo Hills.
Kane ka projek, kaba la pynlut T.10 klur, ka thmu ban pynshlur ia ka kam rep tit. Lyngba kane ka sienjam, haduh 1000 ngut ki nongrep kin ioh jingmyntoi ha ka bynta kaba nyngkong.
Ïa kane ka projek la pyntreikam da ka Mendipathar Multipurpose Cooperative Society, kaba la ïalam da ka Sister Rose, bad la bei tyngka da ka skhim SFRUTI na ka MSME, ha kaba ka jingbei tyngka na ka Sorkar ka long T. 3 klur.
Haba ai jingkren, u CM u la ong ba ka jingdawa tit kala kiew bha ha kylleng ka pyrthei, bad ka jingthaw ia kum kane ka Unit kan long kaba myntoi ia ki nongrep. U la pynpaw ba ka sorkar ka la sdang ia ki prokram bapher bapher ban kyrshan ia ki nongrep.
Haba pynshlur ia ki nongrep ban shim ia ka kam rep tit, u la ong ba ka sorkar kan ai jinghikai bad jingkyrshan ia ki riew shimet bad ki seng kiba don jingsngewtynnat ia kane ka kam.
Ha katei ka prokram u la pyllait paidbah ruh ki kali pickup bad ki ksing ki ban pyndonkam ban lum ia u rubber. U la kdew ba ka thain North bad East Garo Hills ki dei kiba pynmih bun bha ia ka jri bad ka Sorkar kan ai jingkyrshan ia ki kam ban pynmih ia ki mar bapher bapher na ka jri khnang ba ki nongrep kin nang kham ioh ia ka kamai kaba heh.
Ka Sorkar kala air uh ia ka Rubber Cinx Unit sha ka Multipurpose Cooperative Society ha Mendipathar.
