Shillong Naitung 12: U Myntri Rangbah ka jylla u Conrad K Sangma hynne ka sngi ula plie iaka Meghalaya Youth League 2024 ha ka jingialang kaba la long ha State Convention Centre da ka jingthmu ban kyntiew ia ka jingialehkai Football ha ka jylla.
Ha kane ka jingialang la iadonlang ki nongkitkam ka Meghalaya Football Association kiba kynthup ia u President u Bah Hamletson Dohling, Bah Sunesh Syiem u Secretary, u President ka Meghalaya State Olympic Association u Bah John F Kharshiing bad kiwei kiwei.
U Conrad K Sangma ula ong, “Ka long ka sienjam kaba khraw kaba la shim da ka Meghalaya Football Association ban pynlong ia ka Meghalaya Youth League 2024 bad kadei ka rynsan kaba khraw ban iathuh ia ki khynnah kiba donsap kyrpang. Kane kan wanrah ia ka jingkylla ha ka jingialehkai football ha ka jylla bad ha ka thaiñ bad ha ka ri baroh kawei.
Haba u President ka MFA ula wan iakynduh ia nga, ngam shym la kyntait ban ai jingmynjur bad ban ai jingkyrshan na ka liang ka sorkar ia ka Association namar ba ka Meghalaya Football Association kadei ka synjuk kaba biang bha bad kaba la noh synniang shi katdei ha kaban kyntiew ia ka kam ialehkai bad ban kyntiew ia ka sap ka phong ki khynnah ha ka jylla”.
“Kadei ka jingkyrmen ba ki samla ki jong ngi kin lah ban tei ia ka lawei ka jongki bad ban ialehkai kum ki nongialehkai kiba tbit bad kan iai don beit ka jingai jingkyrshan ka sorkar na ka bynta ban bei tyngka ha kaba iadei bad ka lawei jong ka jylla” ula ong bad ka pynapw ruh ia ki sienjam kinba ka sorkatr ka thmu ban kyntiew ia ki kam ialehkai ha ka jylla.
Ula ong, ba ka sorkar da ka jingiatreilang bad ki kynhun bapher kum ka MFA yn plie ia ki lad ki lynti ia ki samla khnang ba kin lah ban lehkai bad ba kin long kiba kordor ia ka Association, ka jylla bad iaka ri baroh kawei.
U Myntri Rangbah ula banjur ia ka jingkongsan ha kaban bei tyngka bad ban pynleit jingmut na ka bynta ki khynnah samla namar ba ki dang don ia ka bor bad donkam ban pyniaid pat ha ka lynti kaba dei bad ula ong, ba ka long ruh kaba donkam ban tei bad saindur ia ki khynnah kiba donsap khnang ba kin lah ban pynleit jingmut naduh mynsiem ia ka jingthrang ka jongki bad dei halor kane ka nongrim ba ka sorkar kala pynlong 3 tylli na ki 5 tylli ki Meghalaya Games ha kine ki 7 snem kiba la dep.
Kane ka League kan sdang ha ka 20 tarik u Naitung da ka jingiashimbynta jong ki Associations bapher bapher na kylleng ki bynta jong ka jylla bad ia kane ka League la phiah ha ki ar bynta Sub Junior kiba hapoh ka 14 snem ka rta bad ka Junior kiba hapoh jong ka 16 snem ka rta bad la pynwandur ia kane ka League ha kaInter District ha kylleng jong ka jylla Meghalaya kaban kynthup ia baroh 20 tylli ki District Association kiba pyniaosh bad ka Meghalaya Football Association.
Ka East Zone ka kynthup ia ka Shillong Sports Association, Sohra Sports Association, Riwar Mihngi Football Association, Ri-Bhoi District Sports Association bad Western Ri-Bhoi District Sports Association
Ka West Khasi Hills Zone ka kynthup ia ka Tyrsad Area Sports Association, Eastern Border Sports Association, Eastern West Khasi Hills( Pyndemumiong Sports Association), Mawkyrwat District Sports Association, Nongstoin District Sports Association bad Mawshynrut Sports Association.
Ka Jaintia Hills Zone ka kynthup ia ka West Jaintia Hills District Sports Association, East Jaintia Hills District Football Sports Association, Amlarem Sports Association, Saipung Block Sports Association bad Laskein Sports Association.
Ka Garo Hills Zone ka kynthup ia ka District Sports Association ka Tura, Williamnagar District Sports Association, District Sports Association North Garo Hills bad Baghmara District Sports Association.
Ka jingthmu ban pynlong ia katei ka League ka long ban wad bad ban ithuh ia ki nongialehkai kiba donsap kiban mihkhmat iaka jylla haka National Football Championships bad la khmih lynti ruh bay n lah ban pynlong ia kane ka League man la ka snem.
