Shillong, Naitung 12 : U Myntri ka Development of North Eastern Region Jyotiraditya M Scindia, ula kular ban ai ia baroh ki jingiarap sha ka Meghalaya ba kan kyntiew ialade ha ki kam jngohkai.
U Scindia uba la don ha Shillong, ula iakynduh ia u Myntri Rangbah ka Jylla Conrad K Sangma bad pyniaid ruh ia ka jingialang bishar kam ha ka jingiadonlang u Secretary ka DoNER Chanchal Kumar, u Secretary ka NEC Angshuman Dey, u Chief Secretary ka Jylla Bah DP Wahlang bad kiwei kiwei.
U Myntri ka Sorkar Pdeng ula ai ruh ia ki jingai jingmut bad ki jingbatai halor ki skhim ki ban nang kyntiew ia ka jingpyndonkam ia ka technology, ka jingiada ia ka mariang bad ka kam jngohkai ha Meghalaya. Ula kular ruh ban ai ka jingkyrshan ba pura ia u Myntri Rangbah ka Jylla.
U Myntri Rangbah ka Jylla Conrad K Sangma ula kren halor ka bynta jong ka DoNER bad ka NEC haba iadei bad ki kam pynroi jong ki Jylla, haba ban jur ia ka jingiatreilang jong baroh ki Jylla ka thain nalor ka jingthaw ia ki lad ki lynti ban kyntiew ia ka rep ka riang khnang ban pynkupbor ia ki paid nongrep ha ka Jylla. Ula ong ruh ba donkam ruh ia ka Ministry ba kan shim ia ki sienjam ban leh eiei ha kaban khring ia ki jingkynshew kam hapoh ka thain.
Ha ka jingleit iuhkjat ha NEC Secretary ha Shillong, u Scindia ula ioh iakren bad ki paid nongrep ka Jylla kiba la ioh jing myntoi ba ki project kam rep bala bei tyngka da ka NEC.
Ha kane ka sngi, u Scindia ula pyllait paidbah ruh ia ka NERACE App ka ban pyniajan ia ki Nongrep bad ki nongdie ha ka rynsan digital. Kane ka dei ruh ka sienjam kaba khraw bha ha kaban lah pyniaid iew ia ki marrep ka thain bad ban wanrah lang shi jaka ia ki 50,000 ngut ki nongrep bad 5000 ngut ki nongthied ha kine ki 5 snem ban wan.
Haba kren ha ka jingialang, u Scindia ula ong ba ka North Eastern Region Agri-Commodity e-Connect (NERACE) ka dei ka web portal bad ka mobile app bala pynwan dur ban pyniajan ia ki nongrep ka thain Shatei Lam Mihngi ka Ri India bad ki Iew ka pyrthei.
“Kane ka matti jong ka DoNER Ministry ka pyni ia ka jingkut jingmut jong ngi ban pynkupbor ia ki nongrep da kaba ai ia ka rynsan kaba kin lah pyniaid iew ia ki marrep bad iadait dor ha ka pork aba biang bad ruh ban iapynbeit lypa ia ka iadie iathied” ula ong.
