Khliehriat, Nohprah 3: U Myntri Rangbah ka Jylla Conrad K Sangma hynne ka sngi saitjain ula plie ia ka Lumshnong C&RD Block ba dang shu pynkha thymmai ha Lumshnong, East Jaintia Hills District.
We believe governance closer to the people will ensure schemes reach the villages and are utilized to the maximum for their benefit.
I dedicate this very important milestone to our people of Lumshnong C&RD Block. pic.twitter.com/ihRK8F2d0L
— Conrad Sangma (@SangmaConrad) December 3, 2022
Ia kane ka Block ba thymmai la plie ha ka jingiadonlang u Myntri ka Tnad Commerce & Industries ma Sniawbhalang Dhar bad u MLA ka thain ma Shitlang Pale.
Haba kren ha ka jingialang, u Myntri Rangbah ula ai khublei ia u Chairman bad ki Dkhot ka Joint Action Committee halor ka jingtrei shitom khlem shongthait ban pynthikna ia ka jingplie ia ka Lumshnong C&RD Block.
U Myntri Rangbah ula ong ba namar ka jingbym don ki Administrative Unit bad ki Ophis jong ki tnad sorkar, kane ka thain kala shah iehbein haba phai sha ki kam pynroi bad ki paidbah kila hap ban iaid da ki kynta ban leit sha ki Block ban ioh ia ki skhim pynroi bad kiwei kiwei ki jingdonkam.
Ula ong ba da ka jingdon jong ka Lumshnong C&RD Block, kan wanrah shajan ia ka jingshakri jong ka Sorkar ia u paidbah.
“Ngim kwah ba ki paidbah kin hap iaid ki kynta hynrei ngi kwah ba ki kynhun jong ngi bad ki Ophisar lem bad ki jingshakri jong ka Sorkar kin wan hi shajan jong u paidbah” ula ong haba pynpaw “Kum ka Sorkar, kum u riewsain pyrthei bad Ohisar, ngi dei ban kynmaw ba ka dei ka kamram jong ngi ban ai ka jingshakri ia u paidbah”.
U Conrad ula pyntip ba ka Sorkar Jylla ha kine ki san snem tam kala trei khlem shongthait ban pynthikna ia ka roi ka par ha baroh ki liang hapoh ka Jyla, ban pynthikna ba ki bor sorkar kin jan sha u paidbah ban pynthikna ha kaban iohsngew ia ka sur u paidbah bad ban shakri ia u paidbah.
Ula ong ba wat hapdeng ka khlam Covid-19, ka jingpynlut jong ka Sorkar kala kit palat ia ka 40% haba ia nujor bad ki jingpynlut jong ka sorkar bala leit noh bad ha kine ki saw snem, la tei ia bun ki surok ha Jylla bad jan 3 lak tylli ki Longiing kila ioh ia ki umbam umdih hala iing.
Haba kren halor ka surok Sonapur-Borghat, kaba dei kawei na ki lad pyniasoh ba donkam tam ia ki paidbah ka thain, u Myntri Rangbah ula pyntip ba ka Sorkar kala dep mang palat T. 120 klur ban tei ia kane ka surok ba 29.5 km bad la dep ruh ban buh ia u mawnongrim.
“Kum ka Sorkar, ka jingkut jingmut jong ngi ka long ban pynthikna ba baroh ki kyndong ki kynshrot ka Jylla kin dang jam shakhmat ha ka roi ka par. Ngin nang iai trei khnang ban don shuh ki jaka ba dang sah shadien bad ngin iatreilang ha kaban btin lynti ia ka Jylla ba kan jam shaphrang” ula ong.
Ha kane ka prokram, u Myntri Rangbah lem bad u Myntri ka Tnad Commerce & Industries, kila sam ia ka cheque bala mang naka Grassroot level Response towards Ecosystem Enhancement and Nurturing Scheme (GREEN) / Payment For Ecosystem (PES) sha ki lai ngut ki nongioh skhim ba kynthup ia u Bah Standing Lamare, ka Dorbar Shnong Sonapyrdi, bad ka Presbyterian Church, Sonapur.
Women-led SHGs received the Start Up Fund & Community Investment Fund of ₹48.15 Lakhs under @meg_srlm
Good quality vegetable seeds of ₹14 Lakhs and open pollinated seeds were distributed to our IVCS & CBOs of East Jaintia Hills District.@nstomar @girirajsinghbjp pic.twitter.com/0ttshllGf7
— Conrad Sangma (@SangmaConrad) December 3, 2022
La sam ruh ia ka cheque sha ki san tylli ki Village Organisation jong ka Lumshnong C&RD Block napoh ka NRLM CIF kaba kot haduh T. 14 lak. La sam ruh ia ki symbai rep sha ki 15 tylli ki Integrated Village Cooperative Societies (IVCS) jong ka East Jaintia Hills District.
Hadien kane, u Myntri Rangbah ula plie bad jurip ruh ia ka Ophisar ba thymmai ka Block ha Lumshnong.
