Shillong, Risaw 13 : U Myntri Rangbah ka Jylla Conrad K Sangma ha ka sngi Thohdieng, ula plie paidbah ia ka karkhana pynmih ia ki LED Bulb kaba don ha Hawakhana, Tura.
Kane ka karkhana ka dei kaba la pyniaid da ka GHE Impact Ventures Pvt Ltd bad kala ioh ruh ia ka jingkyrshan na ka Sorkar Jylla.
Haba plie ia ka Project, u Myntri Rangbah ula ong ba ka jingseng ia kane ka karkhana ka dei ka mawjam ba nyngkong ha kaban lah pynmih bording kaba khuid.
“Ngi la pyrshlur bad pyrshang ban tei ia ka sawdong sawkun ka lah ban pynmih ia ka bording kaba khuid” ula ong haba pynpaw ba karkhana LED ha Tura, kaba dei kaba nyngkong eh ha Jylla, kan dei kaban sa pynbud kumjuh ha kiwei ki jaka.
Ula kyntu ia ki paidbah ba kin pyndonkam ia ki mar bala pynmih hi na Jylla ba kynthup ia ki Tnad treikam ka Sorkar, ki Longiing Longsem bad kiwei kiwei khnang ba kan pynshlur ia ki trai nongseng trai Jylla.
Haduh 85 ngut ki shynrang bad kynthei kila iadon bynta ha kane ka GHE Impact Venture hapoh ka karkhana pynmih ia ki LED Bulb.
