Shillong, Risaw 13: Ka jylla Meghalaya khamtam haki jaka them, kala shah lynshop ha ka jingpang Dengue haka ba 44 ngut ki briew kila ioh pang bad uwei u rangbah ula iap, naduh 3 tarik Risaw 2023.
Une u rangbah u dei naka thain Tura, West Garo uba la ioh ia ka jingpang brain hemroid namar bala jur palat ka jingpang Dengue.
Haba pynthikna ia kane ka Myntri ka tnat ka koit ka khiah kkong Ampareen Lyngdoh kala iathuh ba kane ka jingpang Dengue kala pur tang haki bynta ka them rithor jong ka thain Garo Hills.
Ka kong Ampareen kala iathuh na naduh 3 tarik Risaw, kane ka jingpang kala sdang pur haki bynta ka Garo Hills bad naka ka liang ka tnat ka koit ka khiah kala dep ban eksamin haduh 77 ngut ki briew.
“Ka jingpang Dengue kaba dei ka jingiabit naki kynja pyrjong kala pur namar ka jingshlei um, ka jingkiew kynsan ka jingshit haki thain rithor ka Garo Hills hynrei ki paidbah kim dei ban syier mynsiem nanar kane kam dei ka jait jingpang ba iabit para briew” la iathuh ka kong Ampareen.
Ka kong Ampareen kala kyntu iaki paidbah ba kin shim khia daka ba leh khuid bad daka ba phah eksamin haki jaka sumar lada don jingshit bad daka bud ryntih ruh iaki kyndon ka tnat ka koit ka khiah kaba la kdew shai iaki lad jingiada na kane ka jingpang Dengue.
Kala iathuh ba ka tnat kala bthah ia baroh ki jaka sumar ban ai ki lad jingsumar ia baroh kiba don ka jingpang haki thian Garo Hills.
Haba kylli hato kane ka jingpang ka pur ne em sha kiwei ki thain ka jylla, ka myntri ka tnat ka koit ka khiah kala ong “Haduh mynta ia kane ka jingpang ka sakhi tang ha rithor ka thain Garo Hills bad la sngeethuh ba kane ka jingpang ka don tang haki jaka ba jur ka jingshit ka suinbneng. Hynrei naka liang ka tnat ka koit ka khiah kala pynkhreh iaki lad jingiada bad mynta ka kynti kane ka jingpang kala sdang hiar bha ha Garo Hills”.
