Shillong, Naiwieng 20: U Myntri Rangbah ka jylla u Conrad K Sangma hynne ka sngi Balang ula plie paidbah ia ka Integrated Command and Control Centre, Umsawli, Shillong.
Ia kane ka centre la plie ha ka jing iadonlang u Symbud Myntri Rangbah ka jylla u Bah Sniawbhalang Dhar, u Chief Secretary ka jylla u Bah DP Wahlang, ka Director General of Police ka Kong Idashisha Nongrang, u Commissioner & Secretary ka Urban Affairs u Vijay Kumar bad u Commissioner & Secretary ka Information Technology u Pravin Bakshi.
Haba kren ha ka jingialang u Myntri Rangbah ula ong ba ka Integrated Command and Control Centre (ICCC) kadei ka jabieng jong baroh kawei ka Shillong Smart City.
“Kane kadei ka rynsan ka ban lah ban pyniasoh bad kiwei kiwei ki kam ha kaba iadei bad ka Information Technology bad ka long ka Application Programming Interface (API) kaba kham long kyrpang bad ka jinglah treikam jong ka ICCC ka long kaba iar bad kane ka Center kan long kum ka atiar ha kaban iarap ha kaban shim ia ki rai kiba dei ha ka por kaba biang” ula ong.
Haba kren halor ka jingpyndonkam ia ka ICCC ha kaban peitngor, ka jingkhmih ia ki jingpynjulor ka mariang, ka jingsam ia ki jingtip bad jingpyniaid ba man ka sngi ia ka sor, u Myntri Rangbah ula ong “Ka Teknoloji ka long kaba bha katkum ka jingpyndonkam ia ka bad ka jingdon ia ka ICCC kam mut ba ngin lait na kino kino ki jingeh bad ki jingtynjuh hynrei ki jingtip kiba ioh na ka ICCC bad ki jingpyndonkam ia ka ha kaban hsim ia ki rai bad ia ki sienjam kiba la shim kin wanrah ia ka jingkylla”.
U Myntri Rangbah ula kyntu ia ki tnad sorkar kum ka IT, Urban, Police, Municipal ban pynkhreh kloi noh ia ki kyndon treikam bad ki kyndon jingbthah khnang ba ki kor teknoloji kiba la ioh mynta yn lah ha kaban pyndonkam na ka bynta ban pynbha iaka nongbah Shillong bad ban pynlong ia ka kum ka Smart City.
Ula pyntip ba ki sienjam kiban sa shim ka long ban thaw ia ka Data Center Hub ym tang ia ka thain shatei lammihngi hynrei ia ka lammihngi hi baroh kawei namar ngi lah ban leh ia katei bad ula ong ruh ba ka sorkar kala buh ia u optical fiber ha man la ki Block bad ki district kan lam sha ka jingpyniasoh lang bad ka ICCC.
“Ngi dang trei shitom ruh ban pynthikna ba ngin lah ban pyniaid ia ki submarine cable ha Shillong bad ka thong jong ngi ka long ban pyniasoh bad man la ki Block bad ki District ha ka IT network kaba pura,” ula ong. Ula bynrap ba ka ICCC kna pynkup bor ha kaban wanrah ia ka jingai jingshakri kaba shemphang namar ba kam dei eh tang ban ioh ia ka Smart City hynrei ka Smart Governance.
“Ka nongbah ka lah ban long kaba shempang haba baroh ki ai iaka jingiatreilang ym tang ban pynlong ia ka Smart City hynrei wat kum ka nongbah kaba khraw” ula ong bad ka bynrap ba ki jaka sor kum ka Tura bad Jowai kin sa pyniasohlang bad ka ICCC ha kine ki snem ban wan.
Ki bynta kiba kongsan ha ka ICCC Shillong ki kynthup ia ka ICCC platform, ICCC ryngkat bad ka monitoring workstation kaba don ia ka video wall 30 seater operator bad 20 tylli ki workstation, data center, collaboration solution bad ka contact center, city network. Nalor kata ka kynthup ruh ia ka City Surveillance System ryngkat ka Video Analytics, Solid Waste Management System, Intelligent Traffic Management System, City Wi-Fi, Public Address System, Emergency Call Box ryngkat ka Public Address System, Variable Message Display, Smart Pole bad ka Smart Street Lighting.
Ia ka City Surveillance System la dep ban buh ha ki 96 tylli ki jaka, ki Smart Poles ha ki 20 tylli ki jaka bad ia ka Variable Message Display ha ki 20 tylli ki jaka.
Ha katei ka jingialang la iadonlang ki Rangbah Shnong na ki shnong bapher bapher jong ka nongbah Shillong, ki heh ophisar na ka tnad Pulit, Urban Affairs bad Municipal.
