Plie u CM ia ka C&RD Block ba thymmai ha Purakhasia

By
Ka Shlem
-
0
46

Shillong, Nohprah 01 : U Myntri Rangbah ka Jylla Conrad K Sangma hynne ka sngi palei, ula plie paidbah sa ia kawei ka C&RD Block thymmai ha Chongnapara, South West Garo Hills kaba la tip kum ka Purakhasia C&RD Block.

Ia kane ka Block thymmai la plie ha ka jingiadonlang u MLA ka thain Winnerson D Sangma, Co-Chairman ka State Planning Board, Ian Botham K Sangma bad kiwei ki kynrem ki lyndan bad ki bor pyniaid ka District.

Shuwa ka jingpynkha ia kane ka Block, ki paid nongshongshnong ka thain Purakhasia ki hap ban mad ia shibun ki jingeh haba ki donkam ia ki jingshakri na ka Block namar ki hap ban iaid palat kynta ban poi sha ka Dalu C&RD Block wat ia ki kam iba rit eh.

Haba kren ha ka jingialang, u Myntri Rangbah ula ong ba watla ka Jylla Meghalaya ka dei ka Jylla kaba rit hynrei kila don palat 6000 tylli ki Shnong bad ki Kyntoit, kaba la buh jingeh ia ka Sorkar ban pynpoi ia ki kam pynroi sha manla kine ki jaka.

“Kumta ka long kaba donkam ban pynkha ia bun tylli ki C&RD Block, Sub Division bad ki Administrative Unit khnang ban lah rah shajan ia ka jingshakri ka Sorkar sha u paidbah” ong u Myntri Rangbah.

“Namar kata, ka Sorkar kala trei shitom ban pynkha shuh shuh ia ki Block ba thymmai ha kylleng ki jaka jong ka Jylla ka ba shong kat kum ka jingdonkam ka thain” ula bynrap.

U Myntri Rangbah ula ong ba da ka jingpynkha ia ka Block ba thymmai, shibun ki kam pynroi bad ki prokram kin sa poi sha ki paidbah jong kane ka Block.

Shuwa kane, u Myntri Rangbah ula aiti ia ka jingpynbna (Notification) u Lat ba pynkha ia ka Purakhasia Block sha ki bor Disrrict ka South West Garo Hills bala mihkhmat da ka AVD Shira, ADC, hadien bala dep pule ia ka da ka Joint Secretary ka C&RD SR Marak.

Hadien kane, u Myntri Rangbah ula sam ruh ia ki FOCUS Plus card sha ki nongiohskhim, ki khun sniang bad khun syiar lyngba ka skhim PROGRESS sha ki SHG bad ki symbai sha ki nongrep kat kum ka Megha LAMP Project bala bei tyngka da ka IFAD.