Shillong, Nohprah 17 : U Myntri Rangbah ka Jylla Conrad K Sangma ha ka sngi Ba-ar, ula plie ia ka Anti Narcotics Task Force (ANTF) Police Station, ban pynkhlain ia ka jingiakhun ban ratdyngkhong ia u droks napoh ka Jylla.
Ia kane ka Police Station la buh lang ha ka MPRO Office Building, Golf Link, Shillong.
Haba niew ia kane ka sngi kum ka sngi ban sah jingkynmaw ia ka Tnad Pulit bad ia ka Sorkar, u Conrad ula ban jur ia ka bynta ba kongsan jong kane ka Police Staton ba thymmai ha ka jingiakhun pyrshah ia u droks hapoh ka Jylla.
Haba kren ha ka jingialang, u Myntri Rangbah ula ong “Kane ka Police Station ka lah ban i rit hynrei ka jingtreikam jong ka ha ka jingiakhun lane ka thma pyrshah ia u droks kan long kaba khraw bha”.
Ula ai ka jingiaroh ia u Symbud Myntri Rangbah Bah Prestone Tynsong, ia ka DGP Kong Idashisha Nongrang bad ia u Superintendent of Police (ANTF) Jagpal Singh Dhanoa, kiba la pynthikna ia ka jingpyndep ban plie ia kane ka Police Station hashuwa ka Khristmas, kaba dei ka thong bala buh da ka Sorkar.
Haba kren halor ka jingdonkam ka jingiatreilang ha ka jingiakhun pyrshah ia u droks, u Conrad ula ong ba kane ka dei ka thma kaba ym lah ban iakhun tang da kawei ka Tnad treikam. Ula kdew ia ka jingdonkam ka jingdon bynta lang jong ki Pulit, ka Tnad ka Koit ka Khiah bad ka Tnad Social Welfare haba ban jur ia ka jingiatreilang jong ki Dorbar Shnong, ki Nongialam Shnong bad ki Nongshongshnong ban iasnohkti lang ha ka jingiakhun.
“Kane ka dei ruh ka khyllipmat kaba kongsan bha ia nga ban kyntu ia baroh ki nongshongshnong, ban kyntu ia baroh ki nongialam jong ngi, ban kyntu ia baroh ki Shnong ba lada ngi dei ban jop ia kane ka thma pyrshah ia u droks, ngi donkam ban iatreilang. Ngi dei ban kyrshan markylliang” ong u Conrad haba kular ba ka Sorkar Jylla kan pynbiang lut ia baroh ki jingdonkam, ka jingkyrshan pisa, bad ka jingiatreilang.
Ka ANTF Police Station kan treikam kum ka jaka pdeng jong ka jingtreikam na ka bynta ka jingiatreilang bad jingpeitngor ia ki jingkhynra droks ha kylleng ka Jylla. Kane ka Police Station kan don ia u Additional SP, ki Inspector, ki Sub-Inspector, ki Constable bad kin ioh ruh ia ki jingdonkam ha ka liang ka IT.
U Conrad ula pynpaw ba kane ka Police Station kan trei borbah ha kaban tehlakam ia ka jingshalan droks bad ka jingpyniaid iew, ka bynta kaba kongsan eh na ki buit iakhun pyrshah droks jong ka Sorkar.
U Superintendent of Police ka ANTF, Jagpal Singh Dhanoa, ula pynpaw ia ka jingsngewnguh halor ka jingplie ia kane ka Police Station bad kular ia ki paidbah ba ka kynhun jong u kan treikam narieh narieh bad kino kino ki jingtip ba iadei bad ka jingkhynra bad ka jingioh kurup droks, yn sa pyllait khubor da u SP ka District.
Kiba la iadonlang ha kane ka sngi ki kynthup ia u Symbud Myntri Rangbah Bah Prestone Tynsong, Myntri ka Tnad Social Welfare Bah Paul Lyngdoh, Myntri ka Tnad ka Koit ka Khiah Kong Ampareen Lyngdoh, ka DGP bad ki heh Ophis ka Jylla.
Ha kine ki san snem bala leit, ka Tnad Pulit kala register case haduh 653 tylli ha Jylla, kaba lam sha ka jingiohkem haduh 1027 ngut ki shynrang bad 134 ngut ki kynthei. Na kine, 492 tylli ki case ki dei kiba la dep chargesheet bad 25 ngut ki briew kila shah pynngat ha ka jingpynsajia.
Ka jingioh kurup droks ha kine ki snem ki kynthup ia 42.758 kilo u heroin, 13,521 kilo u ganja bad opium bad ka pisa ba T. 95,81,204 nalor lai tylli ki tiar siat.
