Shillong, Naitung 26: Ka Jawaharlal Nehru Stadium, sa shisien kala sakhi ia ka jingthaw histori da ka jingplie paidbah u Myntri Rangbah ka Jylla Conrad K Sangma, ia ka 134th Indian Oil Durand Cup, 2025.
Kane ka dei ka sien kaba ar ba ia ka Durand Cup, ka lympung ialehkai phutbol ba rimtam ha dewbah Asia, la pynlong ha nongbah Shillong.
Ia kane ka lympung la pynsdang da ka jingialehkai jong ki kynhun ka Group E, kaba long hapdeng ka Shillong Lajong FC pyrshah ia ka Malaysian Armed Force (ATMFA).
Lah ban kdew hangne ba baroh ki jingialehkai jong ki kynhun ka Group E kan long ha Shillong ba kynthup ia kawei ka Quarter Final bad Semi Final.
Haba phai sha ka jingialehkai, ka kynhun Shillong Lajong kala pyni ia ka sap ialehkai ba kham pher ha kane ka samoi ba mynta bad la ioh ba ka kynhun kala pyniaid ia kane ka jingiakhun naduh ba riew ka jingput sdang haduh kaba kut.
Ka Shillong Lajong FC kala pynliem ia ka Malaysian Armed Force da 6-0 kol.
Haba ai plie ia kane ka lympung, u Myntri Rangbah ula ong “Ngi da kmen shisha bad sngew sarong ba ka Shillong ka dei kawei na ki nongbah ban ioh pynlong ia ka Durand Cup ha kine ki arsnem kynthih. Ngi ai khublei ia ki Indian Armed Force ba ki jied ia ka Shillong kum kawei na ki jaka ban pynlong ia ki jingialehkai bad ba ai ia ka lad ha ngi ban pynlong biang sa mynta u snem ia kane ka lympung”.
U Conrad ula pynpaw ba ka Shillong ka dei ka nongbah kaba ieid ia ka phutbol bad bynrap “Ka Sorkar Jylla kala ialeh katba lah ban kyntiew ia ka phutbol naduh ki shnong ki thaw haduh ki kyrdan jongkiba la tbit”.
Ia kane ka lympung la pyniphuh iphieng ruh da ki prokram bapher bapher ki shipai ka ri India ba kynthup ia ka jingpyni ia ka Kalarippayattu, ka para motor show, ka motorcycle stunt, ka jingshad bad jingrwai ba kynthup ia ka kynhun Na u Bnai Band, Ahaia Band bad ki akitor Deiwitewan Subah bad Eniba War kiba la rwai ia ka jingrwai bala paw bha “Khun u Woh”.
