Shillong, Lber 30 : U Myntri Rangbah ka Jylla Conrad K Sangma ha ka sngi Nyngkong, ula plie paidbah ia bun tylli ki project ha madan phutbol Umsning, Patarim, Ri-Bhoi District bad pynpaw ba ka Sorkar ka ju ngeit ba “ban wanrah ia ka jingkylla bad ki kam pynroi kiba donkam, ngi dei ban sngap bad pyniadei bad u paidbah”.
Kine ki project kiba la plie ki kynthup ia ka Ri-Bhoi Silk Dream : E-Rise (ka project Eri Rearing, Innovation, Spinning and Environment), ka jingbuh maw nongrim ia ka Umsning Mini Stadium, pynlait ia ka project E-Rise bad jingsam ia ki jingtei bad pynlait ia ka project ai coaching lyngba ka Aspire-FILO app.
Kiba iadonlang ki kynthup ia u Myntri ka Tnad C&RD Bah Sosthenes Sohtun, MLA ka Umsning Dr C Lyngdoh, MLA ka Nongpoh Mayralborn Syiem nalor ki Ophisar na ki bor pyniaid District.
Haba ai jingkren, u Myntri Rangbah ula pynkynmaw ia ki jingiakren ba ula dep bad ki briew ka Umsning ha u bnai Naiwieng 2025 bad ong ba kane ka jingialang ka dei ka jingmih na kaei kaba la iakren bad ong “Kum ka Sorkar ngi don ka jingngeit ba ban wanrah ia ka jingkylla bad ki kam pynroi kiba donkam, ngi hap ban sngap bad pyniajan bad u paidbah bad ngi dei ka Sorkar kaba leh ia ka kam bad ai ka jingshakri hapoh ka por”.
Ula pynkynmaw ruh ia ka CM Connect ha Bhoirymbing ha kaba ki nongshongshnong kila pynsngew ia ka jingdonkam ban don ki prokram ai jinghikai ia ka kam ri dohkha bad ong “Ka dei namar uwei u briew uba la ai jingmut ba donkam ka jingai jinghikai ban ri dohkha, mynta palat 1600 ngut ki nongri dohkha kila dep ioh jinghikai”.
U Conrad ula ong ba dei kum kane ka CM Connect ba ki jingeh kum ka jingduna pynmih ia u sop ryndia namar ka jingduna ban ioh ia ki dieng bsa bam kum ki wieh, ka jingiap ki wieh namar ka jingbym biang ki jaka ban ri khniang ryndia, ka jingbym lah pynmih mar da lade ha kaba 95% na ki sop khniang lah die sha ki briew na Assam ha ka dor ba T.700-800 shi kilo namar ka rukom thain jain tynrai kim lah ban pynmih ia ki mar ba kynsai. U ong ba ki nongreo kila pynsngew ruh ia ka jingduna ka dor jong ki sop khniang haba ianujor bad ki ksai bala pynmih, kaba lam sha ka jingpynmih ia ka project E-Rise na ka bynta ki nongthain jain.
“Tang ha Ri-Bhoi ngi don palat 7000 ki nongri khniang eri bad ki nongthain jain eri bad ngin kyrshan ia ki da ka pali pali ka ban sdang shuwa da 1200 tylli ki longiing kiba don ha ki 22 tylli ki cluster jong ki 5 tylli ki Block, ki ban ioh mar T. 30,000 shikhlieh na ki nongioh bynta” ula ong. Ula pyntip ruh ba ka jingkynshew pisa ba T, 4.61 klur ha kane ka kam kan wanrah ia ka jingioh nong ka ban kot T.10 klur shisnem. “Kane ka jingioh nong kan wan ym sha ka Sorkar hynrei sha ki nongioh bynta bad ki nongrep” ula bynrap.
U Conrad ula pyntip ba ka thong ba hakhmat eh jong ka E-Rise ka dei ban pynbun ia ka jingpynmih ia ki sop khniang ne Cocoon, ban pynkylla sha u ksai ban iohnong kham bun, kyntiew ia ka iohkam iohjam ha ki jaka nongkyndong, kyntiew kyrdan ia ki jingtei bad pynkhlain ia ka jingpyniasoh sha ki iew ki hat na ka bynta ki SHG ka ban lam pat sha ka jingkiew ka jingioh kamai ki nongrep.
Nalor kane, u Myntri Rangbah ula pynpaw ba ka Umsning Mini Stadium ka dei ka jingangnud bala slem bha jong ki paidbah ka thain bad pynpaw ia ka jingkmen ba ula lah ban buh ia u maw nongrim. “Kane ka project ka kynthup ia ka jingsiang ia u natural football turf ne siang phlang ba im ia ka madan phutbol, kynthup ka jingshna ia ka gallery ba don jingkah, ki nala ba narud ka madan bad kiwei kiwei, ki ban kot ia ka T. 4.71 klur” ula pyntip.
Shuwa kane, u Myntri Rangbah lem bad kiwei ki kynrem ki lyndan kila aiti ia ka ERISE Machine, net bad ki cheque sha ki nongioh jingmyntoi bad sam ruh ia ka MSSDA Training Certificate sha ki nongri dohkha.
