Baroh 46 tylli ki Block kin sa iohnoh ia la ki ophis treikam: Hamlet Dohling
Mairang, Naiwieng 10: U Lamphang ka Iing Dorbar Thaw Ain ka jylla Meghalaya Bah Metbah Lyngdoh, hynne ka sngi palei u la plie ia u mawnongrim ban tei ia ka ophis treikam ba thymmai jong u Block Development Officer ka Mairang Block.
Ha kane ka sngi la don lang ryngkat u Myntri ka tnad Community and Rural Development Bah Hamletson Dohling, u Myntri ka tnat Water Resources Bah Brolding Nongsiej, u Deputy Commissioner ka Eastern West Khasi Hills District Bah W. Nongsiej, I BDO ka Mairang Block, I Dr. L.R Hynniewta, ki nongtrei jong ki tnat sorkar bapher bapher bad kiwei de.
Ha ka jingkren kum u kongsan, u Bah Metbah ula ong ba ka Mairang Block ka long kawei na ki Block kiba la rim tam ha ka jylla bad u la ong ruh ba ka ophis u BDO, ka long kawei na ki ophis ba kham donkam jong ka sorkar namar ka long ka nongpyniasoh ia ki paidbah nongshong shnong bad ka synshar khadar lyngba ki tnad bapher bapher ka sorkar.
U Lamphang u la pynpaw ruh ia ka jingsngewnguh ia u myntri ka tnat Community and Rural Department, bah Hamletson Dohling halor ka jingshimkhia jong u ha kaba iadei bad kane ka projek ia kaba la mang pisa 2 klur 88 lak tyngka bad ia kaba yn sa sdang pyntrei noh shen.
U mBah Hamletson Dohling u la kren halor ka jingiaid lynti jong ka tnat lyngba ki snem, khamtam eh ha kaba iadei bad ka jingpyntreikam ia ka skhim MNREGS bad ka jingroi sted jong ka jingdon ki Seng Treilang ne Self Help Group ha ki khyndiat snem kiba la leit noh.
U la pyntip ruh ba baroh 46 tylli ki Block jong ka jylla kin sa ioh ia la ki ophis treikam kiba thymmai bad la mang pisa mar 2 klur 50 lak na ka bynta ban tei ia ki ophis ba thymmai jong 6 tylli ki block. La mang kyllum lang kumba 120 klur na ka bynta ban tei ia ki ophis treikam jong ki 40 tylli kiwei pat ki block.
Kiwei kiwei pat kiba la kren ha kane ka prokram ki kynthup ia u myntri ba dei peit ia ka tnat Water Resources ka jylla, u Bah Brolding Nongsiej, u Deputy Commissioner ka Eastern West Khasi Hills District, u Bah W. Nongsiej, u Additional Deputy Commissioner ka Eastern West Khasi Hills District, u Bah C.P Mawkon bad I BDO ka Mairang C&RD Block, I Dr. L. R Hynniewta.
