Shillong, Naiwieng 27: U Myntri ka Tnad Pule Puthi Bah Lahkmen Rymbui ha ka sngi Palei ula plie ia ka jingpule ban ioh syrnot ne ka Certificate Course kaba hynriew bnai na ka bynta ki nonghikai ki bym pat ioh jinghikai pyntbit naduh ka klas A Rit haduh Klas II haba banjur ia ka jingdonkam ban bteng ia ka jingai jinghikai ryngkat bad ka jingiaid ka por ha ka pule puthi.
“Ngim donkam tang ia ka kyrdan hynrei wat ia ka jingioh jinghikai pyntbit ruh. Ka pule puthi mynta ka long kaba iar, ngi dei ban long kiba la pynkhreh ia kino kino ki jingkylla” ong u Bah Rymbui haba kren ha ka jingialang kaba la pynlong ha DERT, Nongrimmaw, Laitumkhrah.
U Bah Rymbui ula pynpaw ba ka DERT ka don ia ka bynta kaba khraw kum ka tnad jong ka sorkar ban ai jinghikai ia ki nonghikai, khamtam ha kaba iadei bad ka jingpynmih hukum jongka Supreme Court ha ka 1 tarik u Nailur 2025 ban pynlong kongsan noh ia ka TET.
Ula ong, nalor ka TET, ki nonghikai kidei ruh ban long kiba la ioh jingtbit bha. “Ha kine ki arsnem, lada ka Supreme Court kam khmih bniah ne pynkylla ia ka hukum kaba kala pynmih, ka sorkar kan hap ban wad ia ki lad ki lynti ban kyrshan ia ki nonghikai kiba dang ai jingshakri da kaba ai jinghikai pyntbit bad ban pynlong ia ki kum ki nonghikai kiba paka. Ka kamram ka jongka tnad pule puthi bad ka DERT ka long kaba kongsan bha” ula bynrap.
Da kaba ong ba kadei ka jingiaid da ka mishon, u Myntri ula kubur ba ka jingsdang ia kane ka jingai jinghikai kadei kaba la slem bha hynrei ula iaroh pat ba ha dang ha u bnai uba la dep la dep ban sdang ia ki artylli ki jingai jinghikai ne Training.
Ula pynpaw ruh ia ka jingsngewnguh ia ka kynhun myntri kaba la mynjur ban seng ia ka Meghalaya Teachers Training Academy, kaban iatreilang ryngkat abd ka DERT.
U Bah Rymbui ula banjur ia ka jingdonkam ban pynthymmai ia ki kot pule, ban pynthymmai ia ki rukom ai jinghikai ban lah ban iaid ryngkat lang bad ki jingkylla ha ka liang ka pule puthi.
Ula banjur ia ka jingkongsan ba dei ban pynkhreh ia ka lawei jongki khynnah da kaba pyndonkam ia ki kor teknoloji bad ula ong, “Ka AI kadei ka lynti nangne shakhmat. Lada ngi sngewtynnad ne ngim sngewtynnad ruh, ngi hap ban pyniadei bad ka AI ha ki jingpule”.
Haba kubur ba kila don ruh ki jingduna ha ki jingtei bad ki jingdonkam, ula kyntu ia ka DERT ba kan pyrshang ban wad ia ki lad ki lynti ban sdang wanrah ia ki bynta jongka AI naduh klas II shaneng.
Ula ong ruh, kum u Myntri ka pule puthi ryngkat bad u Conrad K Sangma kum u Myntri Rangbah ka jylla, ki iengskehm ha kaban wanrah ia ka jingkylla ha ka pule puthi ban pynthikna ba ki skul kin iohpdiang ia ka jingdonkam ki nonghikai katkum ka jingdonkam ka jongki.
Ha kane ka jingialang la wan ban iadonlang u Director ka DERT u R. S. Manners, u nongshah khot sngewbha R. Rapthap, ki ophisar na ka tnad bad kiwei kiwei kiba la shah khot sngewbha.
U Myntri ula plie paitbah ia ka jingai jinghikai kaba 6 bnai kaba la tip kum ka Certificate Course on Foundational Stage for the Untrained In-service Foundation Stage Teacher of Meghalaya.
