Shillong, Nohprah 22: U MLA ka 17 North Shillong Bah Adelbert Nongrum u la plie paidbah ia u mot lai dong ba la tip kum ka Lawmali Pyllun Triangle kaba don ha Lad Lawmali, Shillong.
Ia kane ka jingplie mot la wan ban sakhi lang da ki nongialam shnong, ki seng Kynthei, ki seng Samla ki nongialam ka sport club bad ruh ki paidbah nongshong shnong.
Haba kren ha ka jingialang u Bah Adelbert Nongrum u la pynpaw ba kum u MLA u dap da ka jingkmen ban ioh pyntyllun lang ia kane ka kam bad ka dorbar shnong ban pynioh ia kane ka scheme.
“Ia kane ka scheme la pynioh lyngba ka tnad trei kam jong ka PWD ha ka mang tyngka ba 10 lak bad kane ka jaka ba la shna pynitynnad kan khring bha ia ki nongiaid nongieng kiba iaid lyngba kane ka jaka,” ong u Bah Adelbert.
Haba kren halor ka jingpynneh pynsah, u Bah Adelbert u la kyntu ia ki paidbah nongiaid nongieng bad kumjuh ruh ia ki paidbah nongshong shnong ba kin kiar ha ka ban pynsniew dur ia kane ka jaka kaba long shisha mynta baka itynnad.
“Kum ki nongtrei ia ka kam ngi dei ban trei ym tang ban ioh ia ka nam hynrei ngi dei ban trei da ka jingkitkhlieh,” ong u Bah Adelbert.
Na ka liang u Bah B Khongwir uba dei u Rangbah Shnong ka shnong Lawmali Pyllun u la ong, Ka Lawmali Pyllun Triangle kan long ka jaka sahnam jong ka shnong bad ia kane ka jaka la ioh jingiarap nyngkong eh na ka scheme ba la ai da ka tnad Soil ban thung syntiew ban pynitynnad ha u snem 2021 bad 2022.
