Nongstoiñ, Risaw 27: U Additional Deputy Commissioner bah M.Diengdoh MCS, hynne ka sngi palei ula plie ia ka jingrakhe National Deworming Day ne ka sngi pyndih dawai wieh ha ka jingialang kaba la long ha Conference Hall, jong ka Ophis DM&HO, Nongstoiñ.
Ia kane ka jingrakhe la pynlong da ka Ophis ka DM&HO Dr S.A Lyngdoh kaba la iadonlang ha kane ka jingialang ha ryngkat ki nongtrei jong ka Tnad ka Koit ka Khiah bad ki Ophisar na ki Tnad bapher bapher.
Haba ai jingkren u bah M.Diengdoh, u la pynpaw ïa ka jingkmen ban ïa don bynta ha kane ka programme kaba thmu ban ai jingmyntoi ïa ki paidbah lyngba ka tnad ka koit ka khiah. U la ong ba ka jingplie ïa kane ka programme kan ai jingmyntoi ïa ki khyllung khynnah ban pynduh jait ïa u wieh bad ka jingpang duna snam.
I Doktor S.A Lyngdoh ha ka jingkren jong I, ila ong ba dei ban lehkhuid khamtam ban sait bha ïa ki kti bad ban khap bha ïa ki tyrsim, khnang ba u wieh un ym ïoh rung ha ka met u briew. Kiwei kiba la ai jingkren ki long u Dr R Laloo bad ka kong I Gymphad DPM kaba la ai ïa ka jingkren khublei pynwai.
