Shillong, Naiwieng 06: Ka St. Joseph’s Secondary School Nongtalang, ha ka 5 tarik mynta u bnai kala plie pyrda ia ka “3rd St.Joseph’s School Knockout Football Tournament 2022” ha Madan Shingtoi ha Nongtalang.
Ka jingthmu jong katei ka lympung ialehkai ka long shibynta ban pynmih pisa iaka skul khnang ba kan nang lah ban pyndap pynbiang iaki jingdonkam jong ka skul baroh kawei.
Ia katei ka lympung ialehkai la wan ban plie pyrda da u MLA barim ka thaiñ Bah Stephanson Mukhim kum u Kongsan bad u MDC ka War Central Bah Holando Lamin kum u Symbud Kongsan ryngkat ka jingiadon lang u Headmaster ka Skul Babu Anthony Pohrmen, ki Nonghikai ka skul, ki khynnah skul, ki riew pawkhmat bad kiwei kiwei.
U Bah Stephanson Mukhim haba ai jingkren, u la pynpaw ba daka jingia shim bynta lang ban ai ka jingkyrshan iakane ka lympung ialehkai kan long ka jingkyrkhu kaba khraw iaka skul khnang ba ki jingthmu jong ka skul kan long kaba seisoh.
U la ong ruh ba lyngba kane ka lympung, ki Samla ialehkai kin ioh ka lad ban pynpaw iaka sap ka phong jongki bad kumjuh ba kin shemphang ba haka jingialehkai kin don kiba jop bad don kiba rem, hynrei kim dei ban kynran dien pynban dei ban nang iai minot khnang baka sap jong ki nongialehkai kan nym long kaba sepei.
Ia kane ka lympung la plie da ka jingialeh kai hapdeng ka Nonglamin FC pyrshah iaka St Joseph FC ha kaba ka Nonglamin FC kala pynliem iaka St Joseph Fc da 4 la 3 kol.
