Shillong, Naiwieng 07 : U President ka United Democratic Party (UDP) bad Lamphang ka Iingdorbar Bah Metbah Lyngdoh u lah ban iakhun na artylli ki Constituency ha ka elekshon MLA 2023 kata na Mairang bad na Mawphlang Constituency.
Ka khubor ba iajan bad ka party ka iathuh ba lada ym bakla, u President ka Party ula rai ban iakhun lang na Mawphlang Constituency ha ka elekshon ban wan.
U Bah Metbah u dei uba mihkhmat ia ka Mairang Constituency.
Hynrei ki iathuh ba ka Party kam pat ioh satia ia ka jingpynthikna na u President halor kane ka rai.
Kane kala mih ruh hadien ba u MLA ka UDP na Mawphlang Bah Eugeneson Lyngdoh ula pynbna ia ka rai ban nym mih iakhun shuh ia ka elekshon MLA ban wan.
Ka khubor ka iathuh ruh ba ka UDP mynta kala shem jingeh ban ioh ia u kyrtong u ban mih bujli ha ka jaka jong u Bah Eugene bad wat ki Nongialam ruh ki don hapdeng ka jingiapher jingmut ba iano kin ai ticket ha kane ka elekshon.
Ha ka jaka ban phaikhmat sha u President barim ka FKJGP Bah Wellbirth Rani uba la rung sha ka UDP dang shen da ka jingthmu ban mih aireng ha ka elekshon la 2023 na Mawphlang, hynrei ia ka ticket la leit ban tyrwa pynban sha u Nongialam ka PDF bah Auspicious Lyngdoh Mawphlang, uba la pynbna ialade kum u kyrtong ka PDF bad ruh ia u Khun jong u MLA barim Bah JA Lyngdoh. Hynrei kine baroh arngut kila kyntait ia ka jingtyrwa.
Namar kane, u Bah Wellbirth ula rai ruh ban nym mih iakhun shuh ha kane ka elekshon ban wan.
Ka khubor ka pyntip ruh ba u Bah Bah Wellbirth ula shah pynduh ticket namar ka jingsheptieng jong ki Nongialam ioh ka kyrtoh kylla ia ka kam long Nongialam ha ka Party.
