Shillong Jylliew 25: Ka Destiny SHG kawei na ki Self Help Group ka shnong Umkaber kaba hap haka Hima Lyngiong Lyngdohship ha ka 24 tarik u Jylliew, kala plie paidbah ia ka jaka sah shongthait ne sah miet.
Kane ka dei u soh ba nyngkong ha ka Them Lyngiong Tyrsad ban ioh ia kum kane ka jaka sah pyngngad.
La plie paidbah ia kane ka jaka sah pyngngad da u Kongsan Bah Tambor Lyngdoh uba mihkhmat ia ka Synjuk ki Hima Arliang Wah Umiam Mawphlang Welfare Society ha ka jingdon ryngkat u Bah Staising Kharbteng uwei na ki riew rangbah ba pawkhmat ka thaiñ, ki Nongialam Shnong, ki Nongialam bad ki dkhot jongka Destiny SHG.
U Bah Tambor Lyngdoh ula ong ba ka Synjuk ka pynshlur ia ki paidbah nongshong shnong ban shim kabu ia ki lad ki lynti ba ki ioh kum kine ki kam ban pynshlur ia ki briew ka thaiñ ban ieng ha la ki kjat, ha ki kam la jong.
Ula ai khublei ia ka Destiny SHG kaba la long ka nuksa ba paka na ka bynta kiwei ki kynhun iatreilang kiba don ha ka thaiñ.
Katba u Bah Staising Kharbteng u la pynpaw ba kadei ka sien ba nyngkong ha ka thaiñ ban ioh ia kum kane ka jaka sah pyngngad bad kyrmen ba kane kan iarap ia ki nongjngohkai pyrthei ban ioh ia kum kane ka jaka sah pyngngad haba ki wan jngohkai ia ka thaiñ bad kan iarap ban kyntiew ia ka ioh ka kot ki longkmie bad ki longïing longsem.
Ha katei ka jingialang la ioh ruh ia ka jingkren na u Rangbah Shnong Bah Bruce Hadem bad na ki dkhot jongka Destiny SHG.
Pule lang ia kane: Byrngem iakhih ki Nonghikai ha EJH lada ym pynsangeh pyntreikam ia ka Ubiattendance App
