Shillong, Nailar 24 : U Myntri ka tnad ka Koit ka Khiah ka Jylla, u James K Sangma hynne ka sngi u la plie paidbah ia ka ophis treikam jong ka Meghalaya Health Systems Strengthening Project (MHSSP) kaba don ha DHS complex, Laitumkhrah, Shillong.
Ka jingdon jong katei ka Project, kumba la ong u Myntri kan wanrah ka jingkylla ym tang ban kyntiew ia ka jingshakri ia ka koit ka khiah jong ki briew hynrei wat ban pynjanai ia ka rukom treikam ruh kumjuh jong ka Tnad ka Koit ka Khiah ka Jylla.
Haba kren kum u Kongsan ha katei ka jingialang, u Myntri u ong ruh ba ka jingeh ba ki tnad sorkar ki kynduh ha kine ki por mynta kadei namar ka jingtrei la ka jong ka jong. Kumta u ong ba lyngba ka MHSSP, kan don ka jingiatrei lang hajuh na ka bynta ban pynbeit ne tehlakam ia ki jingduna hangne hangtai haba iadei bad ka koit ka khiah.
Kumban shu phai dien, ia ka Meghalaya Health Systems Strengthening Project (MHSSP) la soi ia ka soskular ha ka 28tarik u Risaw 2021 hapdeng ka sorkar jylla bad ka World Bank – International Bank for Reconstruction and Development, bad la pynbna ruh ba ka por treikam kan sdang naduh ka 26tarik Naiwieng 2021 na ka bynta san snem.
Ka thong jong ka MHSSP hi ka long ban pynkhlaiñ shuh shuh ia ka jingshakri ha ka koit ka khiah bad khamtam ban ioh ia ka jingshakri kaba paka tam na ka bynta ki paidbah ka jylla.
Ha kane ka sngi u Myntri u la buddien ruh halor ka jingtreikam jong katei ka projek ha ka jingialang bad ki ophisar bad ki doktor bapher bapher kynthup naduh u Ramkumar S IAS, Project Director- MHSSP, Dr. Joram Beda, IAS Secretary, Health & Family Welfare Department, Dr Twinkle Marak, MCS, Under Secretary, Department of Health & Family Welfare, Dr H.C Lyndem, Director of Health Services (DHS-MI), Dr. L Challam, Director Health Services, Maternal & Child Health & Family Welfare (DHS-MCH&FW) bad Additional Project Director-MHSSP, Dr S.S Nongbri, Director of Health Services-Research (DHS-R) bad ruh u Bah F Basan, Additional Project Director – MHSSP ryngkat ka jingtreilang ki heh sorkar jong ka tnad ka Koit ka Khiah bad Project Management Unit- MHSSP.
La pyntip ruh ha ka jingialang ba ka MHSSP ka don ruh la ka jong ka Live Website kaba don lut ia baroh ki jingtip kiba iadei bad ka projek. La pyntip ruh ba ia kine baroh lah ban ioh da kaba ñion ha ka link – https://meghssp.org/ . Lyngba kane lah ruh ban iohi wat ia ka koit ka khiah jong ki nongshong shnong ka jylla.
Ka MHSSP ka la sdang ruh ia ka jingtreikam khlem da pyndonkam shuh da ka juk thoh ha ki kam ki jam hynrei baroh ki long beit da ka juk ki kor ki bor mynta lane da ka online Digital Document Filing System (DDFS).
Lyngba kane ka projek la pynkhreh ruh wat ban buh ia ka drone hub ha Jengjal, West Garo Hills District nalor kiwei kiwei ki jaka ban peit ia kito ki jaka ba jynjar ban pynpoi ia ki lad ai jingsumar.
