Plie lynti ka Sorkar ia ki Nongrep | Yn sdang da ka Iew ki Nongrep ba shisien shibnai ha Shillong

Shillong, Kyllalyngkot 23: Ha kawei na ki sienjam kiba kongsan ban pynkhlain ia ka kamai kajih ki nongrep bad ban thaw ia ka lad ban pynpoi beit beit ia ki marrep na kper sha ki nongthied, ka 1917 iTEAMS hapoh jong ka Department of Agriculture and Farmers’ Welfare lyngba ka jingkyrshan ka Meghalaya Farmers’ (Empowerment) Commission (MEFC), kan pynlong ia ka Iew ka Nongrep kaba shisien shi bnai ha ka jylla ne ka State’s Monthly Farmers’ Market ha ka sngi Saitjain ka 24 tarik u Kyllalyngkot.

Ia kane yn pynlong ha ka jaka pynieng kali jong ka Directorate of Fisheries kaba don mar pyrshah ia ka St. Edmund’s College, Shillong, naduh ka por 9:30 mynstep haduh 4 baje janmiet.

Ha kane ka jingpyrshang kaba nyngkong eh, yn pynleit jingmut ha ki sohniamtra bad pathaw kum ki jingthung kiba mih ha kane ka aiom ban pyni ia ka jingmih ki jingthung ha ka por tlang ha ka jylla Meghalaya bad ban plie lad ia ki nongrep ban die ia kine ki jingthung kiba dang shu kheit ban die beit beit sha ki nongthied nongpet.

Ka SOMOI, kaba dei ka app khaii pateng kaba mih hi na kane ka nongbah Shillong kala iatreilang bad ka Farmers’ Markets ka sienjam ban shim ia ki marrep beit beit na ki nongrep, ban pynkhlain ia ka jingkhaii bad ban kyrshan ia ki longiing kiba im jakpoh da ka rep ka riang. Da ka jingbtin lynti lyngba ka jingiohi jngai jong u Myntri Rangbah ka jylla u Conrad K. Sangma ban pynlong ia ka rep ka riang kaba iai neh bad kaba lah ban kamai don burom da man la ki nongrep ha ka jylla, kane ka jingtyrwa ia katei ka iew kadei ka sienjam kaba kongsan ban pynkup bor ia ki nongrep, ban kyntiew ia ka jingsengkam lajong bad ban pynkhlain ia ka ioh ka kot ha ka thain.

Ha man ba pynlong ia ka Iew ki nongrep kaba man la u bnai yn pyniaid iew ia 3 tylli ki jingthung kiba mih ha katei ka aiom kaban iaid ryngkat bad ka rukom pynmih ha ka jylla.

Kane ka sienjam ka thmu ban plie lad ia ki nongrep ban ban don ia ka rynsan kaba la aiti kyrpang ia ki ban die ia ki jingthung ki jongki sha ki nongthied nongpet bad ban kyrshan ia ka jingseng kam lajong kiba donbynta ha kaba iadei bad ka rep ka riang bad ki mar kiba pynmih lyngba ka jingthain kti.

Ban pynduna ia ki lad ban iaid pateng na kiwei pat, ka thmu ban kyntiew ia ka kamai kajih jong ki nongrep bad ban pynthikna ba kan don ka jingioh kaba biang. Ka kyntiew ruh ia ka jingpyndonkam da ki marrep kiba dang shu kheit, kiba na ka jylla, kiba shngain ban bam ha ryngkat bad ka jingpynkhlain ia ka jingiadei jongki iew ki hat ha sor bad nongkyndong kiba don ha kane ka jylla.

Ka Farmers’ Market kan pyni ruh ia ki jingshet ia kaba yn leh da ki dkhot jongka Van Dhan Vikas Kendra kiba la ioh jinghikai na ka Institute of Hotel Management, Shillong. Ki nongleit sha kane ka iew kin ioh ia ka lad ban mad ia ki jingbam kiba la pynmih na u sohniamtra bad pathaw kiba la shet hi ha katei ka jaka, kaba long ruh ka lad jong ka jingpynkhreh kaba na kper sha ka pliang beit da kaba pyndonkam da ki jingthung kiba la pynmih hi hapoh ka jylla.

Kane ka sienjam kan pyniasoh ruh ia ka Farmers’ Market sha ka almanak ne Calendar jong ka kam jngohkai ha ka jylla Meghalaya bad ban buh ia ka Shillong ha ka kyrdan kum kaba leh man la ka por, na ka kper sha ki miej bam bad ban kyntiew ia ka shlem jong ka kam jngohkai lyngba ka rep ka riang ne agri-tourism.