Shillong Lber 28: Ka Myntri ka koit ka khiah ka Dr. M. Ampareen Lyngdoh hynne ka sngi kala plie pyrda iaka Eat Right Millet mela, International Year of Millet 2023 ne ka mela halor ka jingbam ia u krai, kaba la pynlong arsngi ha Madan Malki, Shillong.
Ia katei ka Mela la pynlong da ka Commissionerate of Food Safety, jong ka sorkar jylla.
Haba kren kum ka kongsan, ka Kong Ampareen kala pynpaw iaka jingsngewhun ban sakhi da la ki jong ki khmat ia ka jingwan iashimbynta ki samla kiba la seng iala ki jong ki kam bad ki nongrep ia u krai bala tip ha ka ktien nongwei kum ki Millet, ha kylleng ki bynta jong ka jylla ban ioh ia ki jingtip bad ban pashat lem ia ki jingtip ki jongki halor kane ka kam rep.
Nalor kane kala ai khublei ruh iaka United Nations kaba la ai jingithuh bad ban pynkhie im biang iaka jingrep ia ki millet.
Ha Meghalaya kane ka jingrep kala sdang kylla long kum ka kolshor jong ki paidbah ha ka jylla bad lyngba ka jingshimkhia ka sorkar jylla, la khmih lynti ba bun ki nongrep kin sdang ia kane ka kam rep kaba long ka rukom rep kaba iahap bad iadei bha bad ka mariang ka bym donkam ban pyndonkam ia ki tiar ban pynbiang ia ka um ne kiwei kiwei bad ki Millet ki dei kiba lah ban pyndonkam lang bad kiwei pat ki jingbam kiba pawnam ha ki iew ki hat.
Hashwa kane, ka Myntri sorkar kala leit ban jurip ia ki dukan kiba la buh ha katei ka Mela kiba pyninam iaki jait Millet ki bapher bapher bad ha kane ka sngi la iadonlang ka Kong R.M Kurbah ka Commissioner of Food Safety, S. Kharsati Director jong ka Agriculture, ka Kong D.B.S Mukhim kaba long ka Assistant Commissioner of Food Safety, East Khasi Hills bad Dr. Sandra Albert, Director, jongka IIPH Shillong bad kiwei kiwei.
Pule lang ia kane: Pynrem ka ACHIK ia ka jingthmu pynlong Rally ka VPP halor ka Roster System
