Shillong, Lber 08: Ka Myntri ka tnat ka koit ka khiah ka Kong Ampareen Lyngdoh hynne ka sngi Thohdieng, kala plie iaka Lumkyrwiang Urban Health Centre kaba don ha ka shnong Lumkyrwiang, West Jaintia Hills District.
Ia kane ka jaka sumar la plie haka jingdon lang u MLA u Bah MLA Wailadmiki Shylla, u Deputy Commissioner cum Chairman District Health Society ka West Jaintia Hills u Bah B.S Sohliya, District Medical & Health Officer Dr. Evalyneda B V Laloo bad President Kur Soo Kpoh Khadar Wyrnai, Daloi Elaka Jowai u Bah Puramon Kynjing.
Haba kren ha kane ka sngi ka Kong Ampareen kala ai khublei iaka Kur Soo Kpoh Khadar Wyrnai kaba la noh synniang iaka jaka naka bynta ban tei iaka Urban health Centre ka ban ai jingmyntoi iaki nongshongshnong ka thain haba pang ba shitom.
Ka Kong Ampareen kala ong ba ka jingplie iaka Health Center ha kane ka sngi kyrpang ki kynthei lane ka International Women’s Day ka long ka jingsngew sarong namar ka Sorkar ka don ka thong ban pynbit pynbiang iaki lad jingsumar khamtam ban kyntiew iaka koit ka khiah ki kynthei haka imlang sahlang.
Ka la ong ba ka long kaba donkam eh ban ai bor iaki kynthei daka ba plie lad ban ioh daki lad jingsumar kiba paka bad kala ong ba ka jingrakhe iaka sngi kyrpang iaki kynthei kan long ryntih bad ka phang pdeng “Invest in Women, accelerate Progress” bad halor kane donkam ban kyrshan bad plie lad iaki kynthei ba kin kiew shakhamt ym ban shu don ka jingisynnei.
Ka Myntri ka tnat ka koit ka khiah ka kyntu iaki nongtrei jong ka Lumkyrwiang Urban Health Centre ba kin phai khmat shaka koit ka khiah ki kynthei ba dang khie samla daka ba ai jinghikai halor ka koit ka khiah, ka jingnang jingstad bad ban sngap iaki jingpynsngew kiba wan shah sumar ha kane ka jaka.
Nalor kane ka Myntri ka kyntu iaka Pharmacy ba kan pynthikna ba kam dei ban don kano kano ka jingduna ki dawai dashin hapoh kane ka jaka sumar.
Ha kane ka sngi la ioh jingkren ruh na u MLA u Bah Wailadiki Shylla, u Deputy Commissioner u Bah B.S Sohliya bad President Kur SooKpoh Khadar Wyrnai bad Dalio Elaka Jowai Puramon Kynjing.
