Shillong, Naiwieng 09: U Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem hynne ka sngi Palei, ula plie ia u Mawnongrim ban tei iaka Resource Recovery Centre (RRC) ha Mawlai Mawroh.
Haba kren ha kane ka sngi u Bah Pyniaid ula ong ba ka Mawlai Mawroh kan dei ka shnong kaba nyngkong ban pyntreikam iaka Solid Waste Management lyngba ka RCC bad kane kan dei ka sienjam ban wanrah ka khuid ka suba hapoh shnong.
U Bah Pyniaid ula ong ba ka jingdon ka RCC kan ai jingmyntoi iaki nong shong shnong khamtam iaki longkmie ki bym donkam onjam namar lyngba ka RCC ki longkmie lyngba ki Self Help Group bapher bapher kin ioh shibun ki lad jingmyntoi.
“Ia kane ka RCC la mang T.57 lak naka skhim jong ka 15th Finance Commission bad naka liang ka district council ka don jingthmu ban tei sa kumba 10 tylli ki RCC ban wanrah ka khuid ka suba ha man la ki shnong” la ong u Bah Pyniaid.
U Bah Pyniaid ula iathuh ba ka district council ka wad ki lad lynti kumno ban iatreilang bad ki bor shnong haba iadei bad ka jingkhuid jingsuba bad ban kyntiew iaka koit ka khiah hala ki shnong.
Ula ong “Kum shi bynta ban pyntreikam hok iaki RCC, ka district council kan ai jinghikai iaki nong shong shnong bad iaki ophisar ka council kumno ban pyntyllun iaki kam jong ka RCC namar ka RCC ka lah ban long ka lad kamai iaki nong shong shnong”.
U Bah Pyniaid ula pynkynmaw baka ka KHADC lyngba ka KHAD (Solid Waste Management) Act 2020 kan iatreilang bad ka World Bank naka bynta ban hikai iaki paidbah nong shong shnong kumno ban leh iaka Solid Waste Management ka ban sdang nala ki tyllong ïing.
