Nongpoh, Kyllalyngkot 14: Ka Bharatiya Janata Party (BJP) hynne ka sngi saitjain, kala plie ia ka Ophis treikam ha Jirang ban pynsuk bad ban pyntyllun ïaki kam jong ka Party ha Jirang Constituency ha ka jingpynkhreh ia ka elekshon MLA-2023.
Ïa katei ka ophis treikam la plie da u bah Ernes Mawrie State President ka BJP haka jingdon ryngkat lang da u Bah Lee Bareh uba dei ruh u kyrtong ka BJP, u ban ïakhun na Jirang Constituency, District President Bah Skhem B Swett, Bah Babul Suting Incharge Ribhoi, District General Secretary Bah Bariphylla Mawphniang, District Vice President u Bah Micheal Madur, u Bah Francis Ryntathiang uba dei kum u Mandal President, ki nongkyrshan jong ka BJP kiba kynthup naduh ki samla ki rangbah bad ki longkmie jong ka Jirang constituency.
Haba kren ha katei ka jingïalang, u bah Mawrie u la khublei ïaki nongïalam kiba ha khmat jong ka BJP kiba na Jirang Constituency ba ki la lah ban trei shitom haduh ba ka ophis treikam kan ïeng bad u la ai mynsiem ruh ba kin dang ïai trei shitom khlem kynran dien khnang ba ka BJP Jirang kan ioh ïa ka jingjop ha kane ka election ka ban wan.
Shuh shuh u la ong ïa ki paidbah nongkyrshan kiba la wan ban sakhi lang ha katei ka jaka, ba kin kyrshan naduh ka mynsiem ïa u kyrtong ka BJP u ban sa ïeng ban ïakhun na Jirang bad u la ong ruh ba kim dei ban shah pynbiej haki party bapher bapher kiba thmu ban pynbiej daki skim bad daka pisa, hynrei ki dei ban peit ïa u briew u ba trei hok ïaka kam kumba ka party ka angnud ban lah wanrah ia ki jingkylla ha katei ka thain.
