Tura, Naiwieng 16: Ka MP Lok Sabha na Tura ka Agatha Sangma kum ka Kongsan hynne ka Sngi Palei kala plie ia ka Zip Lining kaba nyngkong eh ha ka Multifacility Centre, Aminda Rangsa, Gambegre kaba hap ha West Garo Hills.
Ia katei ka jingialang la pynlong da ka Meghalaya Tourism bad ka Aminda Rangsa Eco Tourism Co-Op.
Ha katei ka jingplie iaka Zip Lining la iadonlang u Tangchiring K. Sangma, ADC, WGH, u Rajkumar Hajong, BDO Gambegre Block bad ka Kmie jongka Agatha Sangma ka S. K. Sangma bad kiwei kiwei.
Ka Ava Shereen S Sangma, Tourist Officer jong ka WGH, kala ai iaka jingkren maitphang halor ka jingplie iaka Zip Lining bad la ioh ruh ia ka jingkren na u Nokma ka Aminda Rangsa bad la buh ia ka jingduwai da u Paming jongka Aminda Rangsa Baptist Church.
Nalor kane la ioh iaka jingkren na u Jengman M Sangma, Secretary jongka Aminda Rangsa Eco Tourism Society bad ka Agatha Sangma kaba la ai jingkren kum ka kongsan ha katei ka jingialang.
Ki nongkren ha ka jingialang kila pynpaw ba ka jingplie iaka Zip Lining ka long kaei kaei kaban sah jingkynmaw bad kila pynpaw ruh iaka jingsngewnguh ia kiba la sdang ia kane ka bynta hapo hak rilum Garo.
Kane ka zip line kadei kaba don iaka jingjrong kaba 200 metre bad ka lah ban kit haduh 80 kg ka jingkhia. Kial don 8 ngut kiba la ioh jinghikai na Sohra bad ka jingshim dor ban shong ia kane ka zip line ka long T.200 marwei.
Ia kane ka zip line la tei da ka tnad Tourism bad la aiti noh mynta sha ka Rangsa Eco Tourism Co-Op Society ba kan pyniaid bad ha kajuh ka por ba kan sumar sukher.
