Shillong, Lber 21 : U President ka Meghalaya Pradesh Congress Committee bad MP ka Shillong Bah Vincent H Pala ha ka sngi Palei, ula ong ba ka Congress kala iakren bad u Nongialam ka Trinamool Congress (TMC) bad Myntri Rangbah barim ka Jylla Mukul Sangma ba un wan phai biang noh sha ka Congress hynrei ula pynpaw ba u kwah ban rung noh sha ka Bharatiya Janata Party (BJP) hadien ka elekshon Lok Sabha.
“Nga phla hakhmat jong phi baroh ba ka kynhun jong ngi kala leit iakynduh ia u Dr Mukul bad kyrpad ia u Dr Mukul ba un wan phai biang noh. Nga la kren ia u Dr Mukul ba un wan phai noh sha ka Congress lane u mat sah ha ka TMC, ngin iatreilang ha ka jaka ba ma u dalade un kren ia ki briew ba kin leit rung sha ka BJP” ong u Bah Pala haba iakren bad ki nongthoh khubor.
Haba kynnoh ba u Dr Mukul u don jingkwah ban rung sha ka BJP, u Bah Pala ula ong “ Khlem pep, ki (Mukul bad ka kynhun) kin sa iasoh sha ka BJP. Kila pyrshang ban khot ia bun ki nongtrei jong ngi. Kum ka nuksa na Ri-Bhoi, kila sdang kren ia ki briew ba to ngin iarung noh sha ka BJP. Ha Shillong West bad kiwei ki jaka ruh, ki Nongialam ka TMC kila pyrshang ban khot ia ki Nongialam jong ngi ba kin rung sha ka BJP. Na ka TMC, kila iathuh ha ngi ba kin sa rung BJP”.
U Bah Pala u ong ba dei namar kane ka daw balei ba ka Congress ka kyntait ban iatreilang bad ka TMC ha Meghalaya. Kat kum ka jingong jong u, ka party ha Jylla kala leh bha ia ka homework ne wad jingtip hashuwa ban shim ia kane ka rai.
“Ha Meghalaya, nga shimet bad ka kynhun ngi la iathir sani bha namar ngi tip ba ki Nongialam ka TMC kila iakren bad ka BJP la bun sien. Kala paw shai ba hadien ka elekshon, kiba bun ki nongialam ka TMC kin sa rung sha ka BJP. Namar kata, nga la batai ia ka High Command bad ki Nongialam jong ngi bad kila mynjur bad nga ba ngim donkam ban iatreilang hangne namar ka TMC ka dei ka team-B jong ka BJP. Ta ka daw ngi khlem iatreilang hangne” ong u Bah Pala.
Haba kylli, u Bah Pala ula ong ba ka jingiapher jingmut hapdeng jong u bad u Mukul Sangma kam don satia.
Nalor kane, une u Heh ka Congress ula pynpaw ia ka jingsngew skhem ba ka Party jong u, kan leh kham bha ban ia ka TMC ha Ri-lum Garo ha kane ka elekshon ban wan.
“Nga tharai ka TMC kan nym ioh vote palat ban ia ka BJP. Ha nga hi, ka TMC kan wan ba khatduh ha Ri-lum Garo ha kane ka kynti. Ka rukom treikam ki nongtrei ka TMC bad ka jingwan rung Congress ki nongialam bad ki nongkitkam, la I ba ka TMC kan nym poi wat ha ka kyrdan kaba ka BJP kan ioh ha Ri-lum Garo” ula ong.
 bad Myntri Rangbah barim ka Jylla Mukul Sangma ba un wan phai biang noh sha ka Congress hynrei ula pynpaw ba u kwah ban rung noh sha ka Bharatiya Janata Party (BJP) hadien ka elekshon Lok Sabha.){kind=link}