Guwahati, Lber 21: U IGP (STF) ka Jylla Assam Partha Sarathi Mahanta ula ong ba ka jingioh kem ia ki 2 ngut ki ISIS kynthup u Nongialam ba hakhlieh duh ha India, kadei lyngba ka khubor syntiat bala ioh jingtip la 15 sngi hashuwa ban kem.
U IGP Mahanta ula ong “15 shwa ka jingioh kem, ngi la ioh jingtip ba thikna naki bor syntiat kynthup naka central agency ba ka don ka jingiaid lynti ki heh ISIS haki bynta ka Dhubri Sector. Kane kala pynlong iaka Special Task Force ban leh iaka ba donkam. Ngi la phah iaka kynhun shaki jaka ba lah ban don ki heh ISIS bad haka 18 tarik ngi la sdang ban poi shaki jaka bad haka 19 tarik ngi la ioh biang jingtip ba thikna ba don ka jingiaid lynti ki heh ISIS”.
Ula pyntip ba ki Assam Police ki treikam borbah ban buddien iaka sleeper cells hapoh ka Jylla.
Iaka case la aiti shaka NIA bad u Haris Farooqi lane u Harish Ajmal Farukhi bad u paralok Rehan kidei kiba la thwet daka NIA.
Naka liang u Myntri Rangbah ka Jylla Assam u Himanta Biswa ula iaroh iaki Assam police halor ka jingioh kem ia u Haris Farooqi bad ia uwei u paralok kiba dang don hapdeng ka jingshah thwet daka National Investigation Agency (NIA).
Haka rynsan Social Media, u Himanta Biswa Sarma ula kular ban pynduh iaki kam pyntriem haka Ri ba ialam da u Myntri Rangbahduh u Narendra Modi.
Lyngba ka Twitter X u Himanta ula ong “Ngin bteng iaka thma pyrshah iaka kam pyntriem naka Ri ba ialam da u Myntri Rangbahduh u Narendra Modi. @narendramodi. Khublei @assampolice.”
