Phiah ka GHADC ia ka Executive bad Judiciary hadien ka hukum ka Meghalaya HC

Shillong, Rymphang 16 : Ka Iingkashari Meghalaya High Court kala pynwai noh ia ka public interest litigation (PIL) ba kynnoh pynkhein ia ka jingphiah bor ha GHADC, haba pynpaw ba ki borkhmih kila pyntreikam ia ka hukum ba hashuwa jong ka Iingkashari.

“Namar kane, ym don eiei kaba dang sah ban nang bteng ban shong bishar” ong ka Division Bench ka Chief Justice Revati Mohite Dere bad Justice W Diengdoh ha ka hukum ba pynmih ha ka 10 tarik Rymphang, kaba pynwai ia ka mudui haba kren shai ba dei ban pyndep ia ka jingthung ia u Judge ba pura kat kum ka ain.

Ka PIL, bala mudui da u Flaming B Marak, ka kyrpad ia ka Iingkashari ban pynthikna ba ka Judicial Wing jong ka GHADC ka dei ban long laitluid na ka Executive bad dei ban bud ia ka rule thungkam ia ki Judicial Officer.

Kane ka mudui kala mih namar u SRR Marak, uba shakri kum u Secretary jong ka Executive Committee ka GHADC bad kum u Judge ka District Council Court, Tura- ka jingleh kaba ka Iingkashari ka sngew ba ka dei ka jingpynkhein ia ka rule 10 bad 11 jong ka Garo Hills Autonomous District (Administration of Justice) Rules, 1953.

“Ngi bthah ba u SRR Marak u dei ban sangeh noh ha kaban treikam kum u Secretary ka Executive Committee naduh mynta” ong ka Iingkashari, haba khot biang ia ka hukum ba pynmih haka 10 tarik Nohprah, 2025.

Haba pyntreikam ia ka hukum, ka GHADC kala thung iau PR Marak kum u In-Charge Secretary ka Executive Committee bad u RN Sangma sha ka Legislative Department, katba u SRR Marak un iai bteng ban shakri kum u Additional Judge.’