Aizawl, Naiwieng 13 : Ka jingiather kuli ba khlem sangeh hapdeng ki shipai Myanmar bad ka kynhun People’s Defence Force (PDF) kala pynkylla phetwir ia bun bah ki nong Myanmar na kane ka ri sha Mizoram.
Ia kane la pyntip da ki Heh ka Assam Rifles kiba la lum ia ka jingialang ba kyrkieh bad ki Khlieh Nongsynshar Shnong bad ki Nongialam ka Young Mizo Association (YMA) ban iamir jingmut halor ka jinglong jingman ha ki shnong khappud.
Ki Heh shipai ki iathuh ba kane ka jingialang kala long ha Champai District bad kala iatai ia shibun ki kam ki jam kynthup ia ka jingshngain jong ki shnong ha khappud namar ka thma ha Myanmar.
Ha kajuh ka por, ki bor syntiat bad ki lad pathai khubor ki pyntip ba hadien ka jingiakhun kaba khlem sangeh hapdeng ki shipai Myanmar bad ki PDF, kiba bun bah ki briew kila kylla phetwir bad kila wan rung sha ki shnong khappud ka Mizoram.
Ki khubor ki iathuh ba palat 100 tylli ki longiing na Myanmar kila wan sah riehtngen ha ka shnong Zokhawthar kaba hap hapoh ka Champai District. Kine ki Longiing kila wan mynta la shitaiew eiei.
